Piaggio M. - Poesie 1846/Esopo Zeneize/O Rango, o Zembo e l' Orbo

Da Wikivivàgna
Sâta a-a navegaçión Sâta a-a çèrchia
Esopo Zeneize de Martin Piaggio
O Rango, o Zembo e l' Orbo
[p. 97 modifica]

FOA LIII.


O RANGO , O ZEMBO E l’ORBO.


Ma che bella figûa
Che fasso co-a mæ gamba arrensenïa!
(Dixeiva ûn giorno andando
Un Soppo ranghezzando):
Gente, fæme o ritræto!....
Te ringrazio davveì, Maddre Natûa!
Ti m’hæ ben favorïo
Per fâme mostrâ a dïo;
Bezêugna che mæ Moæ quand’a m’ha fæto
A gh’avesse de pasta carestia ! ...
Ho ûnn-a gamba chi manca ûn parmo e mezo,
Coscì no me gh’arrëzo,
E me tocca a fâ a bella penitenza
De ballâ e sempre andâ
Senza saveì de mûxica, in cadenza!....

E mi (rispose ûn Gobbo) che figûa
Me tocca a fâ !.... cö baûlo sempre a-e spalle!
Bezêugna che o camalle,
E de giorno e de seja!....
Ho ûnn-a voxe scannâ, pâ ch’agge a peja!...
Te ringrazio mi ascì, Maddre Natûa,
Ti m’hæ ben prediletto
De no poeì manco stâ sorvin in letto!...
Quando me fè mæ Moæ
A gh’aveiva, me paeì, troppa abbondanza,
O dunque a fè ûn errô de concordanza
Con fâme quattro parmi e ciù de zembo
Perchè pertûze e mûäggie se m’arrembo!...

[p. 98 modifica]

Cose ve lamentæ?
(Ghe disse ûn poveo Orbo chi i sentì
Argomentâ coscì)
Spëgiæve ûn pô in sce mi, dæme ûnn’êuggiâ,
Zacchè a voî atri mi no a posso dâ!....
Poi me dieì, se gh’è ciù ommo disgraziôu
E infeliçe de mi!....
No posso fâ dui passi de chì lì
Senz’ëse accompagnôu
O da ûn bacco, o da ûn can,
O da chi per caitæ me dagghe man !....
N’ho mai visto mæ Moæ, ni a mæ figûa,
Nè e bellesse che dixan da Natûa;
Comme saeivo contento
D’ëse comme voî atri in mæ zûamento!
Anzi vorrieivo aveì
Non ûn zembo, ma treì....
E davanti, e derrê,
E magära ëse rango da duî pê!....
Aomanco foise guerso,
Che veddendoghe, è intrandoghe per terso,
Porrieivo giudicâ chi ha ciù raxon,
Ma se no veddo ninte , che orbo son!....

Chi i so giorni tranquilli vêu passâ,
No conte quelli ciù de lê feliçi.
Ma quelli ciù infeliçi o pêu contâ.

Piaggio.46-8.gif