 |
Questa pagina a l'è stæta corretta. | |
Daa stassion fin aa maina,
Dapertüto gh’è e culisse;
Fin aa Scorsa i en stà misse
E fin squasi daa banchina;
E anca védele la pè
Quei che va a Sanbartomé.
E lazü dar Canaeto
La gh’è pronta l’oficina,
A tetoia, a palassina,
La gh’è ’nfin o giardineto.....
Andé a vede, e, garantì,
Daa belessa a resté lì.
La gh’è e machine, ch’i lüzo
Come speci; la gh’è i torni,
La gh’è i mantizi, gh’è i forni,
Der carbon la gh’è ’r pertüzo,
Ch’i è ’nzà tüto areencì
Da dui ani, o zü de lì.
I han provisto 'nzà i fornei
De büscage e de tachele,
Gh'è ’nzà l’ünto ’nte e rodele,
Gh'è ’nza l’aigua ’nt ’i peèi,
Ei bricheti i en enzà lì
A spetae de fae tritrì.
