 |
Questa pagina a l'è stæta corretta. | |
Tüto pronto! anca i bricheti!
Fin a cosa da sfratali,
Fin er bufo da smorsali!
Ne ghe manca che i..... bigeti.
Sensa queli, e chi n’o sa?
La ne gh’è trambai che va.
Sensa queli ne camina
Nessün sito de trambai;
Er controlo di dinai
I è ’r bigeto che ’r combina;
Se no no, come se fa
A savee chi n’ha pagà?
Monta sü na zoveneta,
La s’asseta ’nte na banca,
E la mostra a se’ palanca
A quel’omo daa bereta;
Quando er coso i gh’ha tagià
Aloa le la ghe la dà;
Siché quando, a sta manea,
Monta quelo dar controlo
Pea verifica der bolo,
Aloa le la gh’o tia fea;
E se ’n regola la l’ha,
En pertüzo lü i ghe fa.
