Pagina:Rime diuerse in lengva zeneise 1575.djvu/12

Da Wikivivàgna

E no me deslighé fin a ra morte
Che solo hò liberté d'entr'esto lazzo.

E quanto chiù strenzei de bonna sorte
Chiu desgroppá me sento con sorazzo,
Si che se m'amé, Minna, strenzei forte.


A torto dro cé, Minna, ve dorei
Perchè un oggio dri vostri o s'ha pigiao
E per fá lume a noi l'atro ha lasciao
E a torto d'esse guersa voi chianzei.

Perche doi* soí ro mondo no dè havei
S'un solo n'ha ro cé manco aprexiao
Basta ben che quel'un, chi v'è restao
Vense ro só dro cé como savei.

Puo con doi oggi, como haveivi avanti
Anzi con doi bruxenti, e chieri soi
Bruxavi, e orbivi, ri vostri galanti:

Si che chi d'un sol'oggio ha privá voi
Ro lume hareizo a mille, e mille amanti
E liberé da fuoeghi e da bruxioi.

Ma per voi e per noi;
Guardeve l'oggio bon chi v'è restao,
Perche aura cavá i oggi è monto usao.

Che se quarche arragiao
Quello dose oggio ve cavasse asì,
Direimo bonna notte a mezo dì.