O Cicciollâ 1930/Lieto evento
| ←O sincero amigo | O Cicciollâ de Lieto evento |
Boxìe pietöse→ |
| lasciòu inalterâ a grafia do "Cicciollâ". |
Lieto evento
A bönn-a donna tûtta sorridente
A l’ha criôu allegra: — A l’è ûnn-a figgia!
Unn-a biöndinn-a! sciâ no se lamente,
A reginetta a sià da sêu famiggia.
Sciâ mie comme a l’è snella, a pâ ûnn-a sbiggia;
A l’è ûn pomin de rêusa veramente....
Sciâ a lasce cresce e sciâ veddià che figgia,
Con sta faccetta rionda e promettente.
Sciâ l'è impaziente de piggiala in brasso,
De däghe dôi baxin!... ma sciâ l’aspete,
Finiscio de fasciala e poi ghe a passo,
Cosci sciâ se estaxià de sêu graziete....
Va, poponinn-a, va con quest’ommasso,
Se o no te piggia ûn po’ no l’ha ciû quete!