O Cicciollâ 1930/Boxìe pietöse
| ←Lieto evento | O Cicciollâ de Boxìe pietöse de Gioxeppe Cava |
Ti n'è morta→ |
| lasciòu inalterâ a grafia do "Cicciollâ". |
Boxìe pietose
Ho a morte drento a-o chêu mentre te rio
Çercando consolate, o mae piccinn-a,
E l’êuggio têu me fissa, e o no indovinn-a
Che t’ho promisso tanto e t’ho mentio.
Te parlo d’avvegnî mentre te spio
Do mä i progressi lenti in ta faccinn-a,
Bella comme ûn pomin che za o declinn-a
A-a prim’arba da vitta appenn-a sciôïo.
« Vegnià presto, sta primma co’ i sêu fiöri
E ti d’in letto ti porriae stâ sciû;
Ti repiggiae e têu forze, i têu cölöri
Insemme a tûtto o brio da zöventû.... ».
E ti ti creddi!... Scì, vegnian i fiöri,
Ma ti, purtroppo, ti no ghe siae ciû!...