O Cicciollâ 1930/Invocazion
| ←Un sensâ | O Cicciollâ de Invocazion de Aostin Brun |
O golfo de Zena→ |
| lasciòu inalterâ a grafia do "Cicciollâ". |
Invocazion
O stella mattutinn-a, tûtta grazia e splendô,
che ti brilli in oriente primma che o sciorte o sô;
o stella mattutinn-a, che ti guiddi o mae viaggio,
seggie a tûtti benefico o têu celeste raggio.
E quando, ne-e tempeste da vitta lagrimâ,
franze i mauxi in ti schêuggi e o fa fracasso o mâ,
o stella mattutinn-a, soave ed amorosa,
veggia sorva chi navega comme ûnn-a moâe pietosa.
O tremolante, mistica perla do firmamento,
chi miandote solo no pêu restâ contento?
Chi no te manda ûn baxo, o bella, doçe e pia,
quando all’alba de rêuse sêunna l’Ave Maria?
O stella mattutinn-a, fra tûtte prediletta,
immacolata e pûra da-a man de Dio concetta,
posse in ti chi sospîa trovâ sempre ûn conforto
e per ti a mae barchetta presto razzonze o porto!