O Cicciollâ 1930/A ûnn-a rêusa
| ←O golfo de Zena | O Cicciollâ de A ûnn-a rêusa de Aostin Brun |
Canta o Cûcco→ |
| lasciòu inalterâ a grafia do "Cicciollâ". |
A ûnn-a rêusa
Nell’erbetta,
Fra a viovetta
E camelie e o giassemin,
Ti, rêusetta
Graziosetta,
Ti ê a reginn-a do giardin!
Riçercâ,
Adorâ
Da-i fantin e da-e zitelle,
Ti, rêusetta
Graziosetta,
Ti ê a reginn-a de ciù belle!
Innaffiâ,
Coltivâ
Sempre da ûnn-a man graziosa,
O rêusetta
Graziosetta,
Ti ê ûnn-a cosa ben preziosa!
Chi non t’ama,
Non te brama
Pe-a bellezza e pe l’odô?
O rêusetta
Graziosetta,
Ti ê reginn-a de l’amô!
Che se e spinn-e,
Tanto finn-e
Ti no avesci in fondo scose,
O rêusetta
Graziosetta,
Te ciammieva a sciöa de spose!