O Cicciollâ 1930/Canta o Cûcco
| ←A ûnn-a rêusa | O Cicciollâ de Canta o Cûcco de Françesco Rochin |
Ciù vivo che primma→ |
| lasciòu inalterâ a grafia do "Cicciollâ". |
Canta o Cûcco
A Francesco Spinetta
Pe-e collinn-e
Monferrinn-e
Quando l’ûga da-i maggieû
Pâ ch’a rïe,
Ch’a n’ammïe,
Ch’a n’invite a bocca e o cheû,
Se n’andiëmo,
Se godiëmo
Sotto i fiagni, senza noie,
O ciaretto,
Do vinetto,
Perchè i anni no son gioie.
Passa l’öa
Ne-a demôa
Comme ûn lampo, e o ghindao o gïa
E o desgheûgge
Tûtte e veûgge
Che o se porta, o tempo via.
Daeme o gotto;
Ché ûn strambotto
Veûggio allegro fâghe in çimma.
Tì do çeddro,
Cao mae veddro,
T’ë ben degno e d’ogni rimma.
T’ë o gôghetto,
T’ë o laghetto
Carmo, e o spegio di mae eûggi,
Che galezzan,
Che lampezzan,
Drento ti che t’ë o poae di eûggi.
Pe-e cantinn-e
Monferrinn-e
Se pestezza e se pacciûga,
E se sguassa
Ne-a tinassa,
Fin che bogge e fûmma l’ûga.
Faeme röso,
Dunque imböso
De vin doçe questa seggia;
Me-a riçeivo,
Tûtta ä beivo,
E a no n’é poi gran mâveggia!
Paxe o guaera
Pansa a taera;
Mi m’addormo comme ûn sûcco,
E che o grillo,
Pin d’axillo,
Fâsse l’eco a-o crïo do cûcco.