O Balilla strenna pe-o 1869/L’anno 1869

←Revista retrospettiva europea

O Balilla strenna popolare pe-o 1869 L’anno 1869 - sunetto

Epitaffio in sce a seportua do Rotschild - sunetto→

Zena, Stampaja do Comercio, 1868 - exemprâ conservao inta Libraja Britannica

L’ ANNO 1869

SUNETTO.

Dell’anno nêuvo nominôu chi in çimma,
Perchè chi drento ô no va ben pe-ô verso,
E ô non è ninte comodo pe-a rimma,
A fâ gren ciarle ô me pâ tempo perso.

Perchè me pâ un mincion quello chi stimma
Che dai anni passæ ô saa ben diverso,
Mentre gh’è sempre ancon nell’universo.
O sô e a luña e i ommi comme primma.

Perchè sciccomme in prêuva d’esperienza
Mondo e rêua chi gia sempre l’è tutt’uña,
E do sô van i anni in concorrenza,

E ë teste di ommi van segondo a luña;
Coscì da un anno a l’atro differenza
O ghe n'è poca o no ghe n’è nisciûña.