Ms. Ricci 176/A ra mesima a Roveiruoé

Da Wikivivàgna
Poesie in lengua Zeneise de Giurian Rosso
A ra Sig.ra Delia Spinnora a Roveiruoe.
Da-o ms. Ricci.176, Arch. Stor. do Comun de Zena, www.storiapatriagenova.it.
azonto quarche acenti: acento grave = vocale curta, acento aguçço = vocale longa, -où = dittongo
[p. 4v modifica]
A ra mesima a Roveiruoé


Lustrissima signora,
Beneito sé quell'hora
Che doppo quello poco de bestento
Hei cangioù casamento,
E per fave allegrá tutto ro cuoe,
Ve sei portá da Zena a Roveiruoe.

Sé beneito in restreito
Quello ponto beneito,
Che con ro scio Giruoemmo in compagnia
Dra vostra Signoria
Ra Ponseivera è steta feta degna
De militá sotto ra vostr'insegna.

E a pointo mi me croù,
Che sé stet'osservoù,
Ch'appenna sei arrivé, che con gazera,
Ra nesima sciumera
Con egue impremué fin da ro Cé

[p. 5r modifica]

Corse a baxá d'onde mettei ro pé.

Con egue, che brillando
Dixeivan mormorando,
"Patronna eccave chì, ve semmo sciave,
Vorremmo refrescave,
Oura, che da ri pé d'unna reginna
Passemmo a dá tributo a ra marinna.

Oura che da re spalle
Chì de tutta ra valle,
A nomme universá dro territuoerio
Con doce tremeluoerio
Vegnimmo con quest'humida lenguetta
A leccave per fin da ra bocchetta.

Anzi, de ciù d'in sciue,
Fin da ro Cé vegnue,
Mandé da ro Pianeta, chi ne domina,
Che, comme vuôi se nomina,
Adoremmo in destendese per terra,
Dopp'unn'in Cé un'atra Delia in terra.

Ma non solo per vuôi,
Chì se vè resprandí,
L'egua cera, e brillante ciù dro solito,
Che da per tutt'in giolito,
Pá che riando tutta ra campagna,
Ciante, herbe, frute, scioi diggan cocagna.

[p. 5v modifica]


L'ava a ra ruoesa intorno,
Fuoera pe ro contorno,
Diggando contemprandov'in sta sció
Ciù doce ro licó,
E speggiandos'in vuoi re ruoese tenere
Pa che sentan re spinne li de Venere.

Per tutto ri Grilletti
Se ven fá sgambietti,
Mentre quarch'un de ló de sciù ra tanna
Intonna ra pavanna,
E in canti, e balli, con un doce axillo
Pá che ri grilli ancuoe haggian ro Grillo.

Za veggo uscí per forza
Temporia d'in tra scorza,
Erzendo ri suoe mantesi con l'ara
Lenguosa ra cigara,
Sciù l'organo cantando tutta cuôe,
Sig.ra s[c]ciuoeppe pu chi má me vuoé.

Chì gh[']è ro parpaggion,
Chi scorre in mattion,
E li ra porselletta se scommuoeve
Nontia dre bonne nuoeve,
Mentr'unna luxe insolita l'inganna
Ch'in questo ri vostr'oeggi son ra manna.

Anzi re cerabelle,
Fassando tombarelle,

[p. 6r modifica]

Con ra so lanternetta fan bombere
Tra ló così a mez'ere,
Mentre accrescian ro lumme in questo luoego,
Per miezo dri vostr'oeggi a ro sò fuoego.

Ma soné sciaccarello?
Non ghe metto l'oxello?
Ro rosignuoe meschin, ch'andand'in gruoeria
Cantando ra vittuoeria
Tutt'indrizoù verso ra vostra cera
A sarûá ra primmaveira vera.

Ma con l'oxello apointo
Vuoeggio finí ro quinto,
Perche s'oeggio dí tutto a fe de can
Ghe n'ho fin a doman,
Che per quant'in lodave me remescie
Ro soggetto de longo in man me cresce.