Ms. Ricci 1080-2/Dio v'agguarde d'ogni morbo
| ←torna a l'endexo | Ms. Ricci 1080, sec. XVIII L'orbo mendicante |
Quelli che vendan noxe, e pestelli à re donne→ |
1.
Dio v'agguarde d'ogni morbo
e desgratie tutte quante
donne care o l'è chi l'orbo
scappeloù drito, e tremante
o chi suole ogni settemanna
visità ra sò cazanna
2.
L'è vegnuo per che ghe dè
con larghezza natuà
quello pò de caritè
che ghe sei solite à fà
quando avanti ve o veì drito
besognoso l'orbo affrito
3.
Per che o sà che vuoì ne seì
gratiose tutte quante
basta solo che ne o veì
senza che lè o ve cante
e d'in ciazza che o sarà
ve ro farreì vegnì sciù in ca'
4.
O non canta per che o no puoè
che o se sente un poco mà
o s'ha stimoù mangià dro buoè,
ma l'ea vacca natuà
e per faghea parreì ciù bella
ghe l'han vendua per vittella
5.
E mi à divea o meschinetto
se o n'ha quarche soccorso
l'ha tanta famme o poveretto
che l'è squesi miezo morto,
che se un pò non ghe ne dè
o l'è attorzio donne mè.
6.
Feve donque à ro barcon
à guardà se ro cognosceì
c[']o l'è li con o sò baston
come ben tutte saveì
non ghe manchè d'arvighe a porta
c[']o l'è quello dri atre votte
7.
Duoi garzoin che sotto à sò cua
o l'havè ghe l'han lascioù
un per un l'ha tà rottua
c[']o s[']e un poco retioù
in miseria l'atro è cheito
per tegnine o collo streito
8.
S'eì à caro c[']o monte sciù
e c[']o se leve de chi
à daghe man vegnine zù
e non ro fè tanto patì
che se vuoì non ghe o menè
e non ghe ven in veitè
9.
Haggiè cua che intro menà
o non ve scappe de man
besuoegna ben streito agguantao
quando foisse fin à deman
ma se drito o vorreì fà andà
dighe donde o l'ha da intrà
10.
Quello andà senza capello
per respetto, e reverenza
feto o l'ha d'ogni cavello
anzitempo restà senza
c[']o non stà come vuoì veì
sciù ra sò testa manco un peì
11.
Se ò cioeve, ò baexinna
andà à torno o l'è sforzoù
a sò vitta o l'assassinna
sampegando intro bagnoù
che per chinze dì à vegnì
sempre o spua senza toxì
12.
Non lasciè che sciù ra porta
o se ferme macontento
ma sicome o doveì porta
deghe man, felo intrà drento
che à lasciao li defuoea
vuoì ghe fè cianze ro cuoè
13.
Ma si come liè o l'è orbo
e che a vista no l'aggiutta
procurè tutte d'accordio
de faghera intrà tutta
a sò testa intro porton
c[']o non s'infie intro barcon.
14.
Non v'allamentè de mi
che non ve l'aggie avvisoù
con aveime à dì così
ch'o barcon o v'aggie sguaroù
se non vorreì, che le no o sguarre
allargheghe ben re arve
15.
Che attrovando ra porta averta
o non sarà così un mincion
con o reisego dra testa
infiase pre o barcon
basta, che o barcon e ra porta
o non sè tutt'unna cosa
16.
Se o va in quarche carroggetto
guasto, sempre scontra, e scuggia
pre che l'è orbo o poveretto
ogni cosa l'ingarbuggia
gh'esce ro sangue da ra testa
poi marotto, e mollo resta.
17.
Fene che da re vostre bande
e gh'attroeve sempre netto
c[']o no s'aggie à rompì e gambe
per che o va sempre all'orbetto
e così con ro sò baston
o se ne va sempre attaston
18.
Mi ve diggo c[']o l'è chi drito
con ro collo abbandonoù
con un'atro gran sò amigo
c[']o non ghe l'ha mai lascioù
e che ch'ha vegne da o natuà
a limosina, che ghe vorreì fà
19.
Donque à l'orbo ro qua veì
seì pietose per pietè
allargheghea quanto puoeì
diggo à man da caitè
che o sè per nuoeve lunne
v'allarghe, e v'accresce re vostre fortunne.