Ms. Ricci 1080-1/10
| ←torna a l'endexo | Ms. Ricci 1080, sec. XVIII Cingaresca bellissima |
De sà da Capoanna→ |
1
Bella se ve piaxe
de grazia stè à sentì
cose ve vuoeggio dì
per cortesia
2
E prima d'andà via
se me stareì ascotà
ve vuoeggio fà mavegià
in veritè
3
E si vuoeggio che sacciè
se fuoisi innamoà
come ve deì governà
con i Galanti
4
E si vuoeggio che à Banchi
se ne vende l'histoia
che ogn'un aggie memoia,
de mi meschinna
5
E zà che son in rovinna
che me son derrocà
che ogn'un posse imparà
a e me speise
6
Ve parleò in Zeneize
che ogn'un me posse intende
pre che posse comprende
cos'oeggio dì
7
Assì vuoeggio fà stupì
chi me starà ascotà
e esse inercà...
de maraveggia
8
Che à Zena a paeggia
se stenterà à trovà
come mi matrattà
da ra fortunna
9
Ma spero ancon de fane unna
prima che dè morì
che vuoeggio ancon fà dì
da me personna
10
Fin quando era garzonna
fui un giorno astrologà
che doveiva piggià
ciù d'un mario
11
E che o primmo partio
chi me capitereiva
con quello gh'havereiva
ogni piaxeì
12
Così me marieì
in un zovenetto
bello, e vago in aspetto
fuoea de muoeo
13
Ro qua me speise à proeuo
ciù d'un miggià de schui
tra belletti, e vellui
e Taffettè
14
E de cose che o me fè
non me ne fè parlà
che me sento mancà
bello ro cuoè
15
O dè finna à unna me suoè
ch'era ancora figgia
sei parmi de caviggia
così grande
15
Sò ben che o troppo spande
che ne fuì castigà
che o non me puoè campà
solo treì anni
16
E puoè con mille inganni
me torneì à marià
che me fuisse buttà
zù d'unna liggia
17
Sin quando ero figgia
ch'ero perseguità
ch'ogn'un me voreiva fà
l'appassionoù
18
Mi che aveiva provoù
o primo ch'era bon
me vegne voeggia ancon
d'innamoame
19
Vegniva à cortezame
un bello zovenotto
ma furbo, e gaiotto
fuoea de mesua
20
Che pre me desaventua
o me fava mattinè
o spendeiva dinè
in abbondanza
21
Mi per bonna creanza
finia unna mattinà
o vossi ringratià
in mè bon'hora
22
Liè me respose all'hora
che o me resta obbligoù
d'haveio ringratioù
in quella maniera
23
e si o pareiva in ciera
à sentio raxonà
che l'havesse un trattà
d'unna fantinna
24
me creiva, mi meschinna
d'esse ben capità
c[']o me dovesse trattà
come o primo
25
Un giorno puoè se vimmo
per sorte in un giardin
ch'erimo sciù ra fin
de Carlevà
26
O se misse à cantà
con tanta vigoia
ch'ogn'un si se stupia
de sentio
27
O pareiva un partio
da non lascià scapà
c[']o fava innamoà
chi o miava
28
E mi che me pensava
toccà o sè con o dio
o piggieì per mario
in mè bon'hora
29
Fuiselo steto allora
con unna marotia
chi l'havesse portoù via
in s.ta Paxe
30
Ma l'è miegio che taxe
sò mi cosa farrè
se havesse ciù i dinè
ch'haveiva prima
31
Per un pezzo o fè stimma
assè dra me personna
che me tegniva bonna
fuoea de muoeo
32
Ma haura, o fa che proeuo
cose che o stà à dì
si fareivan stuppì
ogni personna
33
Si ben son troppo bonna
non derrè comportà
lasciame matrattà
da un mascarson
34
Derrè daghe un boccon
faghe passà i monti
sarrè aggiustoù i conti
bellamenti
35
E puoè finse con centi
d'essene despeà
e fao sotterrà
con grand'onò
36
O sarreiva un dorrò
che si o passereiva
e non me ro vireiva
ciù diamanti[sic]
37
Quarche votta con tanti
questi tè se i accattan
che pieso ne o matrattan
de sò sciarre
38
Se pensè maiave
prima che o piggiè
che non v'informè
ben chi son
39
Che doppo a pascion
non stà guei à passà
se sarreì capità mà
meschinna vuoì
40
Sarà da pregà per vuoi
se sarreì ma maià
che non porreì quietà
nuoette ne giorno
41
Ma se muoè ciù mi torno
a esse in libertè
vuoeggio fà dre cose assè
che non ho feto
42
Se ben che l'è un deserto
à e cose che o me fa
che o me sotterreà
mi pe a prima
43
Non ne vuoeggio fà stimma
voeggio lascià corrì
o porrè ancon morì
pe o primo liè
44
E si vuoeggio stà inderrè
se ra posso scappà
non vuoeggio ancoa fà
che o se ne rie
45
Direi forsi che mie
ò torto à lamentame
ma non doverè trattame
come o tratta
46
Che tutto o me stralatta
fra vende e impegnoù
o m'ha tosto despaccioù
mezo ra ca'
47
L'atr'heri o m'impegnà
e me robbe de dosso
à segno che non posso
ciù spaegà
48
E se o puoesse zugà
a sò parte dro sò
con sò gran desonò
liè o fareiva
49
E non gh'importereiva
che o mondo dixesse
basta che liè se puoesse
contentà
50
Non o vuoeggio giastemà
ma son ancon de pareì
che o deggiemmo veì
zugà in Gallea
51
L'atro di sò che o gh[']ea
ma a sorte l'aggiutà
me dixan che o guagnà
unna man de lie
52
Non seì questi chie
lò ghe havean moloù
fin che l'aggian tioù
a o sò dissegno
53
Ma seguo me stimmo
che se o ghe torneà
un dì o ghe resteà
de bonna vuoeggia
54
Tremo come unna fuoeggia
non sò cose me digghe
imparè vuoi atre figgie
à innamoave
55
Si ben finzan d'amave
finzan morrive approeuo
fin ch'han feto à sò mueo
da puoè ne ciantan
56
L'è o pezo, che s'avvantan
d'haveive imbertonoù
e come v'han ciantoù
Lò se ne rian
57
E si ben che sospian
à quelli non ghe creì
che o fan per pareì
ciù appassionè
58
Ghe restereì ingannè
ve parlo in geneà
se stareì à ciarlatà
con quest'e quello
59
Perderei o servello
atro non farreì
viegie ghe vegnieì
come o cucco
60
Non ve posso dì tutto
che non è de raxon
ogn'un fa o mincion
questo ve baste
61
Me ven in cuoè e frasche
che o primo me fava
che sempre o se sforzava
à dame gusto
62
E d'ond'era, per tutto
o se veiva spaegà
che o non puoeiva stà,
se o non me veiva
63
E se o non saveiva
per sorte onde piggiame
o perdeiva à sercame
a mattinà
64
E se vorresse contà
e cose che o m'ha feto
i piaxeì che o m'ha deto
ve stupiesci
65
Ma questo se savessi
e cose che o me fa
i desgusti che o me dà
n'han fin ne fondo
66
Ma son cose dro mondo
besuoegna haveì patienza
e fà a penitenza
dro peccoù
67
E zà che l'ho piggioù
che me son contentà
o sercheò de contentà
à bella meiegio
68
Orrè ch'o foisse viegio
che non m'importereiva
che forsi o me fareiva
ciù caesse
69
Basta che o non cazesse
de quello brutto mà
che se suole ciammà
a giosia
70
Che l'è unna maotia
stentosa da guarì
bastante à fà inmattì
chi gh[']è d'intorno
71
O me vegne l'atro giorno
che m'ero desmentegà
in ca' con unna fascià
do moscattello
72
Ghe lasciava o ciù bello
ma zà che son à raxonà
ve a voeggio contà
per fave rie
73
Me vegne questo chie
in casa tutto armoù
con dì che o l'ha crioù
con un barexello
74
O l'haveiva un pestello
unna cazza in man
in testa un Tian
da repaase
75
O vegniva da armase
d'in ca' d'unna personna
chi se tegniva bonna
de burlà
76
A o fè accompagnà
da unna man de Guarzoin
che fen fà ri vexin
tutti in barcon
78
O l'haveiva un correzzon
unna sporta à ro collo
un mezo ferriollo
de buratto
79
E come bon sordatto
arrivando in caminà
o buttà unna cannonà
per fase onò
80
O menò tà fettò
che finna i vexin
sentin l'odò dro bin
d'in casa sò
81
E si o me sporcassò
tutta ra caminà
o me ghe fè unna fainà
come se dè
82
Non ghe puoeiva stà appè
si ben gh'era passoù
tanto l'era addobboù
pollitamenti
83
Questi son i contenti
i spazij che o me dà
e suoè veggiee che o fa
à o Carlevà
84
Se son ben capità
considerè un pò vuoì
se ho de sti favuoì
se staggo fresca
85
Piezo che unna Fantesca
da liè son matrattà
che o me fa lavoà
come unna cagna
86
E se a giorna a
E se à o giorno o m'accompagna
ghe pà che o fasse assè
se o l'avvanza i dinè
dro servitò
87
O se crè fase onò
e si o se fa burlà
ch'ogn'un o stà à mià
e dixe a sò
88
Ma un giorno ghe dirrò
non ghe vuoeggio vegnì
feve mincionà vuoì
se n[']eì coè
89
Semmo un poco scorrozzè
per che zeì à veggià
in ca' d'unna mè commà
chi è li vexinna
90
Me creiva, mi meschinna
che non puoesse fallì
ma sò che dei da dì
à ciù de quattro
91
S'ho feto un desbaatto
ve o lascio giudicà
se ghe zeì per passà
un poco a seira
92
Ma non m'importereiva
quanto in conclusion
che o Re de baston
andasse attorno
93
O vidde l'atro giorno
mentre o m'accompagnava
un chi me seguitava
de lontan
94
O l'era un baccan
de quelli, che non suan
che spesso ve sauan
con a paoletta
95
O corse à casa in fretta
presto, à piggià un pugnà
che o ro voreiva ammazzà
in tutti i conti
96
E se non eran pronti
li dotreì à tegnio
o non sarrè ciù vivo
o meschinetto
97
E mi ciù che de passo
me missi à caminà
come unna despeà
per tutto Zena
98
Povera Maddalena
sonniè ben capittà
me vorrè esse maià
in un zavattin
99
Và miegio i boccoin
che à re votte se fan
e mangian de cose an
allegramenti
100
E mi ho suoenno à i denti
che finna o mangià
liè me lascia mancà
de votte assè
101
E se non ho de dinè
besuoegna che ne troeve
ste chi son usanze nuove
che o tia fuoea
102
E se in casa o non truoeva
o disnà come o vuoè
pieso che i figgioè
le se repetta
103
Povera garzonetta
che non gh'era avvià
pensè come don stà
son ancon zazunna
104
Mirè se per fortunna
gh'havei ninte da bon
moveive à compaxion
de regalame
105
Serchè recoveame
e fero voentera
zà che veggo ch'haveì ciera
de corteise
106
Seì chiù che non pareì
signoa gratiosa
affabile amorosa
in veritè
107
Mi ve ringratio
dra vostra cortesia
ma prima voeggio finì
cose ho incomensoù
108
Si ben quando m'appenso
non derrè parlà
per non fà mormoà
quarche begghin
109
Ma da puoè in sciù ra fin
a non è robba arrobà
che ne posse imbrignà
chi stà à sentì
110
Che son tutti favoì
tutte gallantaie
che me foin dete à mie
quando era figgia
111
Che deì savei, che se piggia
quando s'è cortezà
ò che ne seì amà
da quarche amante
112
Mi ch'era galante
assè ben vosciua
per che era de nattua
gratiosa
113
Unna lettera amorosa
ve vuoeggio un pò mostrà
ch'a pà steta sbozzà
per man d'amò
114
Chi è d'esta tennò
ch'aora interndereì
se ve contentereì
de dame audienza
115
E così l'incomenza
Idolo del mio cuore
albergo del mio amore
anima mia
116
Il malan che dio le dia
e re parolle attosceghè
marviaggio à chi ghe crè
à ste capette
117
Che pà che v'oeggian mette
in sciù ri sette sè
dappuoè com'han moggiè
Vattei à piggia
118
Fin quando era figgia
ch'era unna de quelle
che me luxia ciù ra pielle
che o berodo
119
Aora che n'ho ciù un sodo
che non son ciù stimà
son vegnua arrapà
come me veì
120
Quando haveiva dro peì
ch'haveiva dri dinè
era dre cortesè
sen'era à Zena
121
Era Sig.ra Maddalena
ma aora che n'ho ciù un sodo
son deventà Madaenna
questa l'è a me penna
che ho à o cuoè
122
L[']e quello chi me duoè
c'ho cangioù naso, e bocca
che son tosto ciù sozza
che Simon
123
Ma son ancon d'oppinion
che se tornasse à maià
me tornerè à repiggià
come se dè
124
Osciù guardemmo cose gh[']è
che l'è hora de finì
son restà così chi
anima mia
125
Il mio cor non dessia
altro che voi mio bene
che siete l'unica speme
di mia vita
126
Che come calamita
m'havete tolto il cuore
che per cagion d'amore
non è più mio
127
Per quell'aia de Dio[1]
se n'havesse havuo de dinè
gh'haverè misso coè
de butta fuoea
128
Me cianze bello o cuoè
non a posso finì
ve creì che ne saccian dì
dre paolette
129
Queste bocche d'erbette
che chi e sente raxonà
pà che ve voeggian fà
Mari, e Monti
130
E dixan che son pronti
che ve vuoean servì
se dovessan patì
qua se voegge penna
131
Puoeran de bonna menna
de bonna qualitè
da puoè come i eì piggiè
son basilischi
132
Vorrè che ri sentissi
quarche votta raxonà
che ve fareivan tremà
l'annima in corpo
133
Vuoeggio che veghemmo un poco
unna ruoesa de diamanti
che me dè o primo galante
c'haggie havuo
134
E si me creiva seguo
c[']o me dovesse piggià
ma da puoè fui burlà
come è l'usanza
135
O l'hebbe ancon creanza
che o meschin o me disse
che questa a godisse
per sò amò
136
Hebbi un pò de dorrò
de veime dà lisenzia
ma o non se ne zè senza
egua boggia
137
Assetteì ra cortesia
e o ringratieì
e o lisentieì
corteisemente
138
Fuisse ancon quelli tempi
de quando era fantinna
che non sarrè in rovinna
come son
139
Dime senza paxion
bella o vostro pareì
che sò che v'intendeì
da Poesia
140
Questa che ho à ro collo
se ciamma unna gorea
mirrè un pò se à ra ciera
a me stà ben
141
Gh[']e de quelli, che se cren
Ch'ha[sic] me sè steta donà
assì me l'ho accattà
di miè contanti
142
Con questo pà de guanti
lavorè à o teà
fin quando ero spozà
a prima votta
143
Me i feì fà à me posta
che quando me i misse
se credeivan che fuisse
unna zittenna
144
Haveiva unna cadenna
tutta d'oro smaltà
se o non me l'havesse impegnà
a ra Cazanna
145
E l'atra settemanna
se mi non era lesta
o m'impegnava questa
ch'ho à ro collo
146
E si o fa dro galant'hommo
che chi parla con liè
o tratta sò moggiè
da unna Reginna
147
E assì son a ciù tapinna
chi se posse trovà
ch'ho me manda à lavà
finna i drappi
148
Farrò dri desbaratti
se o non cangia conprexion
che o resteà un mincion
con i feti miè
149
Orsù restè con Diè
che me ne vuoeggio andà
che non posso ciù stà
in raxonamento
150
E stè con o cuoè contento
saccieve mantegnì
che da puoè non porreì dì
mi no l'orreiva
151
Ve daggo a bonna seia
addio che ve lascio
addio o miè cuoè
o miè barascio.
- ↑ cfr. E. G. Parodi, Arch. Glott. It., v. XVI, 1902, p. 360 (G. Musso)