Lunaio Regiña 1891/15
| ←O nêuvo in arte | Lunaio zeneize compilao da-o sciô Regiña & C. pe l'anno 1891 de No so ciû quello che vêuggio! |
Stravaganze d'ûn libbrâ→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
CANSONETTA
No son ciú morto nè vivo,
Ciû de ninte no me fa,
Sensa scopo nè motivo
Giandonezzo in çà e in là
Comme ûn môuxo intorno a-o schêuggio
No so ciû quello che vêuggio;
2.
Vorriæ giä pe l’Accassêua,
E dappoi no vêuggio ciû;
Intro in casa, e sciorto fêua,
Monto in letto e sâto zû,
E me vesto, e me despêuggio:
No so ciù quello che vêuggio!
3.
In te fæste, in te demöe
No me posso divertï;
Quande parlo co-e scignôe
Me ven quæxi da dormï,
E spalanco e særo l'êuggio:
No so ciû quello che vêuggio!
4.
Cianzo, rïo, prego e giastemmo,
Me dispero e torno in mi,
Odio, ammo, canto e fremmo,
Diggo no, e diggo sci,
Son ûn lion, son ûn pighêuggio:
No so ciù quello che vêuggio!
5.
Scrêuvo, ascondo, taxo e conto
I mæ ciæti a chi no-i sà;
Pe poei scrive ûn verso pronto
Piggio a penna e a caccio là;
Arvo, lezo, e særo o fêuggio:
No se[sic] ciû quello che vêuggio!
6.
O perchè chi l'indovinn-a?
Perchè son ûn bullibæ;
Perchè ho l'anima piccinn-a,
Perchè in causa de l'etæ
Ingianchindo a vista d'êuggio:
No so ciû quello che vêuggio!