Lunaio Regiña 1891/16
| ←No so ciû quello che vêuggio! | Lunaio zeneize compilao da-o sciô Regiña & C. pe l'anno 1891 de Stravaganze d'ûn libbrâ |
Pe-i Veteren do 1848 e 1849→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
A passämene mez'ôa
Stava ûn giorno da ûn libbrâ,
Quand'inträva ûnnn-a scignôa
Sottovoxe a domandä
O volûmme intitolôu:
Amô disinteressôu.
2.
Ma aççendendose ûn sigaro
Ghe rispose o sciô libbrâ:
Questo chi o l'è ûn libbro raro
E diffiçile trovä
Da-o momento che l'amô
O s'è fæto venditô.
3.
Doppo questa, ûn perdibräghe
Tûtto cô da sabadiggia
O vegnîva a domandäghe:
« I segretti de famiggia »
Ma o libbrä o te g'ha risposto:
Poei saveili in ogni posto.
4.
Comparindo ûn çerto tale
A çercä mëzo affannôu
O divorzio coniûgale;
O libbrâ o te g'ha sbraggiôu:
Quante l'è che tra i maiæ
Se pêu vive separæ!
5.
A ciû d'ûn chi domandäva
A raccolta di grend'ommi
O libbrâ o ghe replicäva:
« Con bruxô di galantommi
« Che no i stimman da-o partïo,
« Questo libbro o l'è esaurïo. »