Lunaio Regiña 1890/Cöse sento a-o fonografo
| ←O fonografo | Lunaio zeneize compilao da-o sciô Regiña & C. pe l'anno 1890 Cöse sento a-o fonografo |
E lamente do cappello a cilindro→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Sento ûnn-a mosca chi me sghêua d'intorno,
Un chi vende ciæbælle pe lanterne,
Un chi conta de vescie tûtto o giorno,
Un chi m'annoia co-e lamente eterne:
Un chi spära di gosci e di erexïe
E ch'o se credde d'ëse chi sà chïe!
2.
Sento e conversazioin noiöse, inscipide
De case de civile condizion
Donde mensûnnan l'Eschilo, l'Euripide
E l'Omero, e o Virgilio, e o Ciceron,
Donde tra o gran sûssiego se finisce
Con parlâ de bacilli e stocchefisce.
3.
Sento ûnn-a rendaiêua che vanamente
A se sforza a parlä civilizzôu,
Un che co-a vöxe o l'insordisce e gente,
Un che parlando pä ch'o perde o sciôu,
Un che, con ëse vëgio e arrensenïo,
S'o vedde quarche bælla o ghe fa o sïo.
4.
Sento unn-a donna chi se dixe onesta
E che, per tale voendo ëse ciamâ,
In ta sò casa gh'è delungo festa,
Abbondanza de beive e de mangiä;
Mentre sò maio a ghe vêu tûtta e o stenta
A guadagnäse quelli da polenta.
5.
Oh cose sento!.... Indovinælo ûn po?
Un chi me dixe: « Me ne batto e stacche!
Scibben che no conoscio l'i da l'o,
Ho a faccia franca e no patiscio e tacche.
Basta che mette insemme di dinæ,
No me n'importa ûn corno d'onestæ!....
6.
Sento ûnn-a societæ de pixonanti
Che fan complotto pe montâ e pixoin,
Un mûggio d'affaristi e d'intriganti
Che discöran de voti e d'elezioin;
Un mûggio de sensæ de l'angonïa
Ch'impicchieivan sò poæ pe mëza lïa.
7.
Sento ciù d'un chi scrive di libelli,
Che de ricatti e de calûnnie o scampa,
E con fä nasce scandali e bordelli
O sciorte fêua con l'onestæ da stampa;
E ch'o l'ha o möro a däse de l'onesto
Con fä o sciûscetto, senza dive o resto.
8.
Sento parlä tedesco dappertûtto
E Prinçipi tedeschi camminâ
Ne-a nostra Italia, che pe puia do brûtto
Con l'Austria e co-a Germania a s'è alleâ,
Mentre che da-i Asburgo a povëa Trieste,
Con nostro sgrêuxo, a l'é arrangiâ da-e feste.
9.
A bælla vöxe do sciò Crispi sento
Chi vêu fä vedde e fä toccä con man
A stimma, l'affezion, l'attaccamento,
L'interesse do popolo Italian
Con quelle gente che ghe dan do bravo,
Mentre o vorrieivan, comm'o l'ëa, so scciavo.
10.
Sento Bismarche chi perlecca e bäxa
L'Autocrate da Rûscia, pe cacciâ
Un pö de çenie sorvia tanta bräxa
Chi minaccia d'aççende e d'incendiâ
O mondo Slavo, chi giastemma e smania
Pe mezûäse con l'Austria e co-a Germania.
11.
Sento l'Ingleize che co-e lie sterlinn-e
De disnate e di balli o ghe fa dä;
Ma o Rûsso remmesciando e sò pedinn-e
A reginn-a Natalia o fa viagiä
Finzendo sostituila a-o re Milan;
Per avei di Balcani a ciäve in man.
12.
Sento questa reginn-a lamentase
Che no ghe lascian vedde o sò figgiêu
Che, pe l'etæ no poendo governase,
Con löde a Serbia governä o no pêu:
Sento che quest'angelica bellessa
A l'è trattâ con somma rigidessa.
13.
Con voxe ammagonâ sento a Tûrchia
Ch'a dixe: Pûrgo tûtti i mæ peccoeì.
Son chì ridûta in punto d'angonia:
E de mi fæne ûn pò quello che voeì!....
Quande saiô zà morta e sottotæra
Pe Rûscia no tegniö, nè pe Inghiltæra.
14.
Sento desganasciäse da-o gran rïe
Un mûggio de borsisti parigin
Che bravamente fan sparî e mialïe
Co-i traghetti che fan d'ogni pittin,
Mentre a sò patria a no n'aviä speranza
D'ëse mai ciû l'onnipotente Franza.
15.
Sento ûnn-a voxe chi s'affanna e dixe:
Italia, Italia, te ghe vêu prûdenza!
No te confiä do lûstro e da vernice
Pe l'amô da tò santa Indipendenza:
E mentre fremme tûtto o mondo in braxe,.
Armite in guæra, pe difende a paxe!