Lunaio Regiña 1890/O fonografo
| ←Un amîgo a-a prêuva | Lunaio zeneize compilao da-o sciô Regiña & C. pe l'anno 1890 O fonografo |
Cöse sento a-o fonografo→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Viva, viva l'invenzion
Do fonografo Edison
Chi sobbacca, chi assottæra
Tûtto quanto gh'emmo in tæra
In trovati e novitæ
Da ciù grande ûtilitæ!
2.
Ve pä ninte o conservâ,
O ripete, o perpetuâ
Un discorso, ûnn-a parlata,
Un conçerto, ûnn-a cantata?
Ve pä ninte o poei sentî
Cianze, rïe, scigoä, toscî?
3.
Nostri nevi, con piaxei
Doppo ûn secolo sentiei
O Gaiarre, a Patti, o Stagno,
Borghi, Singer e Tamagno:
Sentiei scinn-a l'uragan
De cioccate che ghe fan.
4.
Da chi avanti aviei l'onô
De sentî quell'oratô
Che co-a voxe e l'eloquenza
O trasecola l'ûdienza:
E sentieì paddre Agostin
Comm'o foïse lì vixin.
5.
Ve porrieì commêuve o chêu
De sentî o vostro figgiêu
Ch'o cianzeiva in ta fasciêua,
Ch'o ciarlava in casa, in schêua,
Che tra i schitti e l'axillin
O ve däva di baxin.
6.
Anche i morti de Staggen,
E di paixi ciù lonten,
D'in ta tæra sotto a cröxe
Ve faian sentî a sò vöxe:
E do poæ de vostro poæ
Sentieì l'ûrtima voentæ.
7.
Sentiei lödi e cansonette
Che parrian ciûvüe da-o sê,
Ma cantæ da-e moneghette
Di soppressi monestê:
Sentieì cöri de bambin
Someggianti a-i angietin.
8.
Sentiei l'organo in ton grâve,
Inni e salmi accompagnâ,
Insordîve, ciänze, ûrläve
Comme ûn'anima dannâ;
E dappoi portäve in çê
Imbriæghæ tutti d'amê.
9.
Sentiei drento in ti boschetti
O sospîo do ventixêu,
O conçerto di oxelletti
Che fan cöro a-o roscignêu,
O sôave mormôamento
De vivagne e i rïen d'argento.
10.
Sentiei l'ûrlo do mâ grosso
E di venti abborraschæ,
E de sæte spartilosso,
E di troin spropoxitæ;
E giastemme, i cienti, a raggia
E o fracasso da battaggia.
11.
Sensa lëze a paola mûtta
Da scrïtûa scarabocciâ;
Co-a galante d'in Calcûtta
Ve porriei scinn-a parlä;
E colliei quell'esprescioin
Comme dattai e bomboin.
12.
Sentiei fâ tutte e demöe,
Tûtti i sciäti di festin
Donde gh'intran e scignôe,
I bezavi e i damerin:
Sentiei polke e ranversê,
E o strisciä scinn-a di pê.
13.
Sentiei tutte e parollette,
Tûtti i spaximi d'amô,
Tûtti i crii, tütte e smorfiette
Che succedan tra de lö,
Li tramëzo a-o ciæo e o brûn
Sensa scandalo nisciûn.
14.
Da chi avanti l'ommo giözo,
Ch'o temiâ che a sò meitæ
A ghe a faççe d'arrescözo,
Sensa stä con i oëgie affiæ,
Sensa stâ co-o collo in stiêuia
Da-o pertûzo da ciavêuia;
15.
O sentiä tutti i regii,
Tûtte e corne che ghe fan;
O sentiâ scinn-a i sospii,
Scinn-a i bäxi che se dan:
E o faiä che sò moggê
A s'accûze da per lê.
16.
Da chi avanti o delinquente,
L'ommo rëo per convinzion,
S'o no sâ ciù che prudente
Co-i compagni da prexon,
Li ripete o se sentiä
E sò poule in sciô debâ.
17.
Avvardæve o maldicenti
Quande andæ in conversazion
Da-o scöxî quell'innocenti.
Che a difendise no son,
O ripete ve sentiei
Tûtto quello che diei!
18.
O voiätri che piggiæ
Mille e ciù zûamenti fäsci
Pe negâ quelli dinæ
Che pëuan rendive descäsci
Se i dovesci restituî,
Ve sentieì ben descrovî!
19.
O voiätri che dêuviæ
Ciave fäse e grimadelli,
E e bûtteghe svalixæ
Con päfæri e con scöpelli,
Se a Giûstizia a no v'abbranca
No credei de fäla franca!
20.
Viva, viva l'invenzion
De quest'ûtile istrûmento
Chi mettiâ da soggezion,
Do rimorso e do spavento
Chi pûrghiâ l'ûmanitæ
Da-i bonæge i ciù ostinæ!