Lunaio 1810/Ritrêto de Veonichetta
| ←endexo | L'Enciclopedico - Lunario per le Dame - 1810 de Ritrêto de Veonichetta |
A Ninetta→ |
| torna a-i atri lunai |
Ritrêto de Veonichetta
Canzonetta
Veonichetta mi t'agueito,
Perchè a dîtea ho çerta quê,
E te vegno a teito a teito
Comme a rondaninna â stê.
Veonichetta ti me piaxi,
E u[sic] perchè te veuggio dì,
Perchè ti ê un bocchin da baxi
E un pa d'œuggi da stupî.
A to faccia quando neia
A fa a neive vergognà,
Ti no vê a accattâ in Sozeia
O gianchetto da o spezià.
Ti ê i cavelli biondi e rizzi
Da un frexetto ben lighê,
Senza pôve e atri pastizzi
De çeotti e de pomê.
De coallo dui lerfetti
Quando s'arvan pe parlà
Fan mià i to denti netti,
Che l'amò fan innamoà.
Lucrezietta a fa figùa
Ma co a bocca sigillà
Pe n'arvì unna seportùa
Che Portoia a pœu impestà.
Pa che Teexa a sœnne e pôse
S'a se mette a discorì,
Ma a to voxe dôse dôse
A va a o cœu, a se ferma lì.
Scinna a o mento non t'adatti
Un patâêlo insugaò ben
Che ti ê tutti i to recatti
Senza gome e zerbie in sen.
Un pa d'osse de balenna
Pe o to busto son assé,
Perchè ti ê ben fæta a schenna
E de zembo ti no n'ê.
Ti non è comme Luzia
Ch'a l'ha a vitta pertuzà ,
E de strazze a l'è imbottìa
I pertuxi per tappà.
E to gambe son compie
Co a so porpa comme va
Liscie, leste, regagìe,
E ti è sempre ben câsà.
Han in fondo tutte due
Coscì legeo o sò pessin,
C[']o no mescia, pa c[']o sgue
Quando o va pe sò cammin.
Ti ê un regìo de movimento,
Che senz'arte ninte avei,
O te fa in ogni andamento
Sempre bella senza voei.
Çercan tutte d'imitate
Ma ghe perdan breiga e sciaò,
Che a natura ne o stampâte
A l'ha a stampa menizzaò.
Che peccaò che n'euggi azzunze
A sci belle qualitê
Per chi o cœu se sente punze
Un momento de pietê!
Anche in questo ti aviê lode
Acquistando una virtù,
Che se o bello o no se gode
O l'è un quadro e ninte ciù.
Ah se un ôta finarmente
A o tô cœu s'affaccia Amò,
Ah!... me cœu, te vegne in mente
Che gh[']e a o mondo o tò Pittò.