Lunaio 1810/O ratto de coniggio e o ratto de gexa
| ←A Ninetta | L'Enciclopedico - Lunario per le Dame - 1810 de O ratto de coniggio e o ratto de gexa |
Indovinello→ |
| torna a-i atri lunai |
O RATTO DE CONIGGIO E O RATTO
DE GEXA.
Foa
Un Ratto de coniggio despeaò
Senza mezi ed aggiutti o l'ha pensaò,
Per vive meno mâ,
De retiase in ta Gexa da Nunzià,
Perchè o dixeiva: veddo ogni mattinna
Che sta Gexa a l'è pinna
De Focai, Tavernê,
Ostesse, Formaggiê,
E no n'è mai per fa
Che in mezo a questa gente
No trœuve da campà.
Dito fæto, o l'è drento,
E d'un artâ de sotto a o pavimento
O vedde un Ratton vegio
Che co e zampe incroxê
O se batteiva o peto, e o dixe: frê
Son un poveo despeaò, femmose cea:
E o vegio ghe risponde, ben voentea,
Sta mattinna zazunno,
No gh'ò che un pezzo d'osso,
Pe atro quando posso
A tutti daggo aggiutto,
Vattene in segrestìa che gh'è de tutto.
O Ratto ciù meschin,
Confiandose a sto birbo de beghin
In segrestia o camminna,
E appenna o gh'è arrivaò
Da o Gatto o l'è agguantaò,
E o criava sotto o dente
Do nemigo potente,
Façendo guin guin guin:
Possan êse ammazzê tutti i beghin.
Voi che lezei sto misero aççidente
Tegnì ben fisso in mente
Che treitò no gh'è pezo ai giorni nostri
Do piccapeto, e giascia paternostri.