Li fioreti de messê san Francescho/51

←cap. 50

Li fioreti de messê san Francescho cap. 51

cap. 52→

da-o manoscrito Marston 56, f. 133r. - 156v., da libraja Beinecke de Yale, 1465;
clicca i asterischi pe di rafronti co-a verscion toscaña;
clicca o segno ⇔ inta colonna de scinistra pe vixoalizâ a verscion toscaña a fronte

51.

A lo tenpo de frai Jacomo de Falerone, homo de grande santitae, lo qua era grevementi infermo in lo lögo de Molliano de la custodia de Fremo; frai Zoane de la Verna, lo qua alaora stava a lo lögo de la Massa, e odando de la soa infirmitae, persochè o l'avea como so caro paire, or o se misse in ^camin* per ello pregando devotamenti Dee con oraciom mortâ* che o rendesse sanitae a lo dito frai Jacomo de lo corpo, se l'era megⁱo de l'anima soa. E stagando in questa devota oraciom, o fo menao in estrasi e vi in aire um grande exercito de monti Angeri e Santi stâ sorve la soa cella, chi era in la silva, con tanto splendô, che tuta la contrâ d'intorno n'era inluminâ. E inter questi Angeri o ge vi questo frai Jacomo maroto, per lo qua o pregava, e vestio de vestimenta candida e stâ tuto resplendente. E inter li atri o ge vi lo lor santissimo paire messê san Francescho ornao de le sante Piage de Xe. e de monta gloria. E o vi anchora e cognossè san Loize* e frai Matê antigo de monte Rubiano e monti atri frai, li quai o non aveiva mai visti ni cognossui in questa vita. E regoardando cossì frai Zoane con grande delleto quella grande schera de Santi, si ge fo revellao la sarvaciom [dell’anima] de quello frai maroto, e che o devea morî de quella infirmitae, ma non cossì tosto, e che depoî la soa morte o devea andâ a pareizo, per che o ge convegniva in pocho prugasse in progatörio^[sic]. De la qua revelaciom frai Zoane ave tanta alegressa per la sarvaciom de l'anima, che de la morte de lo corpo non se curava ninte, ma con grande alegressa de sprito o ihamà infra lê mesmo digando: "Frai Jacomo, mê doce paire; frai Jacomo, doce frai; frai Jacomo, fidellisimo servo de Dee; frai Jacomo, conpagnon de li Angeri e confortao de li Beai". E cossì in questa atessa e alegressa o tornà in ello, e incontenente o se partì da lo lögo unde ello era e ze a vexitâ frai Jacomo a Moliano.

E trovallo si greve che apenna o poiva parllâ, e si ge anoncià la morte de lo corpo e la sarvaciom e gloria de l'anima, segondo la certessa che ello avea per la divina revelaciom, de che frai Jacomo tuto alegro con la ihera e con l'animo, o lo resevè con grande alegressa e con alegro rizo, regraciandolo de le bone növe che o ge portava e arecomandandose devotamenti a ello. Alaora frai Zoane ge pregà carissimamenti che pöa che o fosse morto, che o devesse retornâ a ello e dîge de lo so stao; e frai Jacomo ge lo promisse, se o piaxesse a Dee. E dite queste parolle, acostandose l'ora de lo so pasamento, frai Jacomo incomenssà a dî devotamenti quello sarmo de lo versso: "In paxe in vita eterna e' me adormirò e me reposerò"; e dicto quello versso, con alegra e joconda fassa o passà de questa vita. E pöa che o fo sepelio, frai Zoane se ne tornà a lo lögo de la Massa, unde e' l'aspeitava la promissiom de frai Jacomo, che o tornasse lo di che o g'avea promisso. Ma lo dito di orando ello, o ge aparsse Xe. con grande conpagnia de Angeri e de Santi, inter li quai non era frai Jacomo; unde frai Zoane, maravegandosse monto, si lo arecomandà a Xe. E pöa lo di sequente, orando frai Zoane in la selva, o ge aparsse frai Jacomo aconpagnao da li Angeri e tuto gloriozo e alegro, e frai Zoane ge disse: "O paire, perchè non ê-tu tornao a mi lo di che me prometesti?" E frai Jacomo ge disse: "Persochè e' bezögnava de alchuna prugaciom; ma in quella mesma ora che te aparsse Xe. o te exaudì e me liberà da ogni peña. E alaora e' aparssi a frai Jacomo da Massa, e santo laicho, lo qua serviva la messa e vi l'ostia consagrâ, quando lo preve la veiva*, convertia e muâ in um belissimo fantin vivo, e dissigi: "E' me ne vago anchöi in cel con questo fantin vivo, sensa lo qua nissum non ge po andâ". E dite queste parolle, frai Jacomo disparse e zesene in cel con tuta quella beâ conpagnia de Angeri; e frai Zoane romaze monto consorao.

E lo dito frai Jacomo morì la veiria de san Jacomo apostoro de lo meze^[sic] de lugo, in lo sorvadito lögo de Moliano, in lo qua Dee per la soa mizericordia ge mostrà monti miracori.

A lozo e a gloria de messê Ihu. Xe. Amen.