Li fioreti de messê san Francescho/43

Da Wikivivàgna
Sata a-a navegassion Sata a-a serchia
Li fioreti de messê san Francescho
cap. 43
da-o manoscrito Marston 56, f. 133r. - 156v., da libraja Beinecke de Yale, 1465;
clicca i asterischi pe di rafronti co-a verscion toscaña;
clicca o segno inta colonna de scinistra pe vixoalizâ a verscion toscaña a fronte

[p. 146r modifica]43.

Lo dito frai Curao de Offida, miraber zeletô de la evangellicha povertae e de la regulla de san Francescho, [fu] de si relegioza vita e grande merito apresso de Dee, [che] Ihu. Xe. lo ornà* de monti miracori jn soa vita e depoî soa vita.

E inter li atri, una vota seando andaito a lo lögo de Offida forestê, e li frai lo pregàm per amor de Dee e de caritae, che ello amonisse um frai zovem chi era in quello lögo, lo qua se conportava cossì fasamenti e dezobedientementi, che li vegij e li zoveni de quello monestê o li turbava tuti, e si non se curava de lo officio e de le atre regulle. De che frai Curao per conpassiom de quello zovem e per le pregere de quelli frai, si ihamà da parte lo dito zovem e in frevô de sprito e de caritae instantementi o ge disse si devote parolle de ameistramenti si che con l'övera de la divina gracia quello zovem subitamenti devegne, de grasom, vego de costumi e si obediente e solicito e pacifficho e frevente a ogni cossa virtuoza, e cossì como avanti tuti li frai eram turbai de questo zovem, cossì per lo contrario tuti ne romazem contenti e consorai e si lo amavam grandementi.

Or, como piaxè a Dee, o cheite che de li a pochi di depoî questa soa consolaciom*, questo zovem morì, de che li frai se ne dorsem asai, e de lì a pochi di l'anima soa aparsse a frai Curao, stagando ello in oraciom davanti l'otâ de lo dito convento, e si lo saruà devotamenti como paire; e frai Curao ge disse: "Chi e-tu?" E quello ge respoze: "E' sum l'anima de quello frai zovem chi morì questi di". E frai Curao ge disse: "O figör carissimo, che è de ti?" E quello respoze: "Paire reverendissimo, o n'è bem per la gracia de Dee e per la vosta[sic] dotrina, e sapiai che non sum danao, ma per serte mê peccae, de le que e' non avi tenpo de fâ penetencia, e per quelle e' ne sostegno grande peñ[e] in prugatörio; per che e' ve prego, paire, che ti, cossì como per la toa pietae me socoresti quando e' era vivo, per che aora cossì te piaxe de secôreme in queste mee peñe, digando per mi alchuni paternostri, perochè la toa oraciom è monto aseta a Dee." Alaora frai Curo[sic], consentando begnignamenti a le soe pregere e digando una vota lo paternostro con requiem eternam, disse quella anima: "O paire carissimo, quanto bem e quanto refrigerio centi-e! Per che e' te prego che ti lo digi un'atra vota". E frai Curao lo disse; e dito che o l'ave, disse l'anima: "O santo paire, e' me cento tuto alegro de la peña quando ti ori; unde e' te prego che ti non resti de pregâ." Alaora frai Curao, vegando che per le soe pregere quella anima era tanto aiâ, si disse per ello cento paternostri, e conpij che ello li ave, disse l'anima: "Paire mê, e' te regracio da parte de Dee e de la caritae che ti ai avoto inver de mi, perssochè per la toa oraciom e' sum liberao da tute le penne e aora e' vago a lo regno celestiâ." E dite queste parolle l'anima se partì. E frai Curao, per dâ alegressa e confforto a li frai, si ge disse per ordem tuta quella vixiom.

Amen.