Laude zeneize/19

Da Wikivivàgna
Sâta a-a navegaçión Sâta a-a çèrchia
Laude zeneize do XIV sec.
XIX. La salutacion de la santa croxe.
ms. D.1.3.19 Bibl. Berio - ed. da V. Crescini e G.D. Belletti, Giornale Ligustico X, 1883
torna a-a lista di atri scriti
[p. 346 modifica]

XIX.
La salutacion de la santa croxe.


1.
De te salve, santa croxe,
erboro d'amor piantao!
Tu portasti lo doce fruto,
chi lo mondo ài sarvao.

2.
De te salve, santa croxe,
arboro piantao de amore,
chi portasti lo fruto doce,
chi ài sarvao li peccaoi!

3.
Or chi non sente lo to dozor,
degna croxe e veraxe?
Per ti fo faita la doce paxe
de la guerra de lo peccao.

4.
Per ti, doce croxe, se fè la paxe
de quella guerra si forte,
quando Criste Deo veraxe
in ti vosse portar morte.

5.
Lo peccao si se comforte,
chi per lo legno era perduo;
per ti, doce legno, l'à remuo
Criste agnelo immaculao.

6.
O doce legno de la croxe,
tu fosti ornà de gran splendore,
de le membre precioxe
de lo nostro Salvaor.

7.
In ti morì lo Redemptor,
chi à conchiso lo serpente,
per chi Adam primè parente
si caze in lo peccao.

8.
Adam in lo legno fo venzuo,
per chi noi eramo danai,
et Criste in lo legno fo metuo,
per chi noi semo salvai.

9.
Noi semo lavai da li peccai
in lo sangue de l'agnelo,
chi per noi vegne da cel,
e in croxe fo sacrificao.

10.
Adam lo fruto de l'arboro preixe
per che tuto lo mondo periva,
et Criste in la croxe se desteixe ,
che per noi salvar moria;

11.
Adam a Deo dexobedia,
e si mangià lo pomo cum diletto,
et Criste agnelo mansueto
tanti tormenti à portao.

12.
Criste per noi à combatuo
sun lo legno de la croxe,
et gran ferie à recevuo
in le soe membre precioxe.

13.
De quelle piage si penoxe,
peccaor, or t'aregorda,
et in lo cor la croxe porta,
per la quar tu e' salvao.

14.
Peccaor, lascia lo peccao
e sei de la croxe tuto aceixo;
per la croxe tu e' sarvao,
e da li inimixi tu e' defeixo.

15.
Chi da Criste se sente ofeixo
vage alla croxe cum speranza,
et lì troverà perdonanza
de lo so grande peccao,

16.
O croxe pinna de splendore,
pinna de si grande belleza,
in ti se trova ogni savore,
e de ogni doceza pina

17.
tu dai conforto e allegreza
alli iusti e a' peccaoi:
in ti morì quelo Segnor,
chi lo mondo à salvao.

18.
Chi trova mai fruto si doce,
ni de tanta utilitae,
como lo fruto de la croxe,
chi n'à lavai da li peccai?

19.
O Criste, Re de pietae,
de chi non te de servir?
Per noi tu voresti morir,
et lo nostro debito ài pagao.

[p. 347 modifica]

20.
Or chi à lo cor si ferito,
chi non senta lo to dozor,
de quelo fruto beneito
de l'arboro piantao d'amor?

21.
Pianzamo davanti allo Segnor
graindi e piceni ata voxe,
che ello ne dea paxe per la croxe,
e si ne meine a lo so regno beao.