Fili d'erba 1890/inferno/7
| ←Canto sesto | Traduçion libbera di primmi sette canti de l'Inferno do Dante Ardighê de Canto settimo |
| Pe 'n rafronto co' l'originâ sciacca o segno ⇔ inta colonna de scinistra |
.jpg)
Co-a voxe rescádä sbraggiäva Plûtto:
Vegni Berlicche, vegni a fäghe a caccia!.....
E o gran Virgilio, ch'o saveiva tûtto,
O m'ha dïto: No temmo a sò minaccia,
Perchè impedite de chinä dabbasso
O no porrïa con quella brûtta faccia.
No serve che lê o ciamme Satanasso
Con tûtti i sò seguaci a fäghe scorta,
Che no porriàn respinzite d'ûn passo.
E poi rivolto a quella faccia storta
Taxi, o g'ha dito, maledetto lô,
In santa paxe o tò venin sopporta.
No n'è senza motivo che o Segnô
O ne permette de vegnï chì drento
Donde Michê o l'è stâeto vinçitô.
E comme e veie gonfie da-o gran vento
In sciä coverta cazzan ingûggeite
Quande se rompe l'aerboo a-o bastimento:
Coscí tûtte e sò forze ghe son cheite
A Plûtto; mentre divimo tra noì:
Segnô, ghe l'ei mandôu? Segnô, ve o meite!...
Coscì semmo chinâe tra i peccatoî
Do quarto gïo, ciû verso a trista sponda
Che do mondo a l'acchêugge tûtti i doî.
Quell'anime dannâe favan a rionda
Comme môuxo con môuxo s'incappella
A Cariddi, pe-o vento chi g'abbonda.
E comme se confonde e s'incanella
L'âegua queta con l'âegua da corrente,
Ch'a vegne in mouxo chì a piccä con quella,
Coscì quelli meschin continuamente
Piccavan ûn con l'ätro, e se sponciavan
In moddo da no dïse, e orrendamente.
Co-o pëto di gren peizi remesciavan
Ne-o mentre che de l'ommo strallaton
E de l'avaro tra de lö se davan.
Se veddeivan vegnï zu arrûbatton,
E ne-o maeximo posto ritornä
Tûtti chinâe da-o peizo, e in strambâelon.
E mì, che me ne fava quâexi mä,
Ghe dixeiva a Virgilio: Dimme o veo,
Son prâevi quelli là con a cëgâ?
E lè a mì: Son matti tûtti a reo;
E laichi, e prâevi, e pappi, e cardinali,
Che favan chi o spendâeso e chi l'ebreo.
E mi g'ho replicôu: De questi tali
Dovieiva ben conoscine ciû d'un
Pe-o caxo che occorïsse d'annotali.
E lê a mì: Conoscine nisciûn
Ti no porriâe, pe-a vitta sregolà
E vergognoza c'han tegnûo ciascûn.
Tra lö in eterno se veddian sponciä
Avari e strallatoin, sensa pietâe,
E questi peizi enormi remesciä.
I primmi s'addesciàn co-e moen serrâe,
Ne-o giorno do Giûdizio Universale,
I ätri con i cavelli streppellâe.
O spende e sò sostanze e l'ammûggiäle
G'ha fâeto, perde o ben do Paradiso,
E tormentase a questo punto tale.
Da lö ti pêu piggiäghe ûn serio avviso
Che chi no fa bon ûzo da fortunn-a
Se trêuva ne-i destrasci all'improvviso.
Che tûtto l'ôu che l'è sotto a lunn-a
O che gh'ëa zà, de queste gente chì
O no porriâe riäbilitane ûnn-a.
Mî g'ho dito: Cao Meistro, dimme ascì
Chì a l'è questa fûrtunn-a che ti vanti?
Che disponn-e di beni a peû coscì?
E a mì Virgilio: Povei ignoranti!
Quande a veddei ghe criâe dâeghela a-o-lô,
Incangio de trattala con i guanti.
Dio, che de tûtti i dotti o l'è o dottô,
Ne-a sò sapienza o fabbricava i çê
Con armonia de moto e de splendô.
Onde a fortûnn-a, chi ne ven da lê,
A poeiva comandä che diventasse
Un ricco, e l'ätro sensa scarpe in pê.
Con lê l'è comme manco se parlasse,
Pe l'ê no gh è nisciûn impedimento,
A cangia e strasse in ôu, e l'ôu in strasse.
Aôa chinemmo zû a maggiö tormento
Zà mëzanèutte addosso ne vegniva
E no se poemo ciû affermä ûn momento.
Trapassavimo o gio de l'ätra riva
Sorvia d'ûnna fontann-a chi se versa
In t'ûn fossôu, da-a quâe lê o ne deriva.
A l'êa quell'âegua ciû che storbia e spersa;
E con quell'âegua pinn-a de merdasso
Emmo vortôu pe direzion diversa.
E chi se ghe formava un atro brasso
D'âegua stagnante e pinn-a de relento,
Da-o rian de Stige zû corrìa dabbasso.
E mi, che stava lì con l'êuggio attento,
Ho visto gente appöze in tö pätan
Che se piccavan di pattoin pe-o mento.
E no contenti de piccä co-a man
S'assestavan testâe, cäsci e dentâe,
Sbranandose a tocchetti comme o can.
E m'ha dito Virgilio: Chì dannâe
Son quelli pin de raggia e de raoxia;
E vêuggio che ti tocchi co-a veitâe
Che sott'âegua gh'è gente chi sospia
E mentre s'arrûbattan zû pe-o fondo
A-a galla fan vegnï l'âegua sboggia.
Appöze in to pätan, dixan: A-o mondo
Semmo vixûi de fä de malazioin
Portandone con noï l'astio profondo.
Aôa ne rode a bratta in ti pormoin,
Se negan queste poule in to cannoëzo
Perch'a dile co-a bocca no son boin.
Coscî squaddrando i soffochâe tramezo
A quell'âegua fangosa, chi no cöre,
Dopp'ësighe passâe quâexi d'in mezo
Semmo vegnûi a-i pê d'ûnn-a gran töre.