Esopo Zeneize 1822/O Scolâo, e a Formigoa
| ←O Matrimonio de l'Agno | Esopo Zeneize de O Scolâo, e a Formigoa |
O Cavallo, e o Porco→ |
| Zena, Stampaja Pagan, 1822 - Primma ediçion e en stæti reixi con êu e ôu. In notta e diferençe co' l'ediçion do 1846. |
O Scolâo, e a Formigua.
Un Scolâo, pezzo d’aze, mascarson,
Buggi-breiga e potron,
Solo pe-o zêugo, e pe-a demôa portôu,
Così nemigo zûôu
Do travaggio, do studio, e do latin;
Virgilio, Ovidio, Orazio, con Çiçeon
Allighivan i denti a sto mincion,
Ghe piaxeiva ciù a balla cö ciumin;
Fessa d’iniquitæ,
Senz’amô, nè caitæ,
Se in stradda o l’intoppava
Un Gatto, un Can, un-na Galin-na, un Bæ,
O i piggiava a sascæ,
O i scorriva, o ghe dava , o i ammassava;
Un giorno de mattin,
Ch’o l’ea c’un bacco longo in t’un giardin
A fâ caccia de Grigue,
(E a quelle, ch’o piggiava, per demöa
O ghe taggiava a testa, o dunque a cöa)
O vedde in tæra un muggio de Formigue
Tutte affannæ a portâ
Con stento, e a rebellâ[1]
Da röba per provvista, e per mangiâ,
O restò stupefæto da pazienza,
De l'inzegno e prudenza
De tutto quello popolo industrioso,
Testimonio invidioso
De tanti belli sforzi, e abilitæ,
O nostro perdigiorni cos’o fà?
Oh eccesso de barbaja[2], e crudeltæ!
Con quello bacco o và,
O l'infia[3] in ta tan-na,
Ghe fruga, e pesta tanto, ch’o e destan-na.
Scappavan povee bestie sparpaggiæ,
E tutte desgûstæ
D’avei perso e provviste, e i magazin,
Lé incangio o se ne rieiva o biricchin,
Anzi o gh’andava apprêuvo a scorratâle,
A sciaccâle co-i pé, a martirizâle,
Pë primme o se sciallava d’ammassâ
Quelle, che s’affannavan de sarvâ
Ancon qualche provvista, un pö de gran,
Un’äa de mosca, un freguggin de pan;
Un-na de queste , un pö meno spujosa,
A se fermò, e a ghe disse coraggiosa:
Bestiassa raxonâ, dimme un pittin
Per cose ti n’ammassi, e ti desfæ
E nostre caze, e i nostri magazin?
Dimme cose te femmo?
Che breiga mai te demmo?
Cose ti guagni, e che gusto ti g’hæ
De fâne a tutte o boja, e l'assassin[4]?
No guagno ninte, o ghe rispose allöa,
Ma o fasso per demöa,
Me ghe cincio, o l’è o mæ divertimento,
E meschin-na! o te a sciacca lì a-o momento.
Poæ de famiggia, ammiæ d’invigilâ
Che i vostri figgi, quando son piccin,
No se divertan de scorrî, e ammassâ
E bestie per demöa , manco i moscin,
Dunque crescian c’un coêu da maxellâ,
E a tutte e cose vorrian vedde a fin,
Quanti exempj vedemmo tutti i giorni
De questi bruxaboschi, e perdigiorni!