Esopo Zeneize 1822/O Gatto, e i Ratti
| ←O Can, e o Gatto | Esopo Zeneize de O Gatto, e i Ratti |
A Mosca, e o Bêu→ |
| Zena, Stampaja Pagan, 1822 - Primma ediçion e en stæti reixi con êu e ôu. In notta e diferençe co' l'ediçion do 1846. |
O Gatto, e i Ratti.
Un bello Gatto gianco veo d’Angola,
Amoroso, e paccion,
Pin de frasche e caeson,
Chi stava sempre in scoso da Padron-na,
O sorve un-na potron-na,
Moscio, perchè o mangiava
De cose delichæ,
Beschêuttin, e zunchæ,
Cosichè a-i Ratti a guerra ciù o no fava,
E i Ratti conoscendo a perfezion
Quello Gatto per moscio, e per potron,
Senza nisciunna puja caminavan
Pe-a casa, e cose voeivan roziggiavan;
L’Angola un giorno doppo avei mangiôu
Ciù do solito o se n’andò a dormî
Solo in despensa, e ghe restò serrôu;
No ghe tardò a vegnî
Di belli Ratti a roziggiâ o prezûtto,
Formaggio, carne, pan, e un pö de tutto,
E vedendo l’Angola lì ärellôu,
Che quæxi o no respïa,
Subito s’han stimôu
D’aveighe misso puïa,
Un Ratto alloa ciù spacchetton, e ardîo
O disse mâ di Gatti,
Tutti g’han applaudîo,
E Generale o proclamon di Ratti;
O monta sorve un fiasco pe' arringâ[1],
Vendichemose, o dixe, bravi amixi,
Che semmo stanchi, e stûffi de mangiâ
Sempre di avanzi di nostri nemixi,
Zûemmo aoa tutti quanti
De mangiâ da chì avanti
Di Gatti solo, che son eccellenti,
Fæti pe-i nostri denti,
Mi o zûo pe-o primmo!.. e i atri... tutti o zûemmo!
Dunque da questo Gatto prinçipiemmo;
A vedde quell’armâ
De Ratti s'avventâ[2]
Contro l’Angola, e dâghe un grande assâto,
Metteivan proprio puïa.... A quello sciato
O Gatto s’adesciò,
Subito o ghe buffò
E co-e ungie, e co-i denti in t’un momento
O fesse in pezzi quello reggimento,
Meno quattro sordatti,
Che scappavan, sbraggiando, granfignæ,
Mai ciù adesciemmo Gatti,
Che dorman, n’emmo assæ,
Ah! no besêugna provocâ i nemixi
Quando ne stan amixi,
Sciolli che semmo stæti! Ben ne stà,
Chi a-o mondo tutto vêu, perde quanto hà.