Esopo Zeneize 1822/L'Erboo de Röve, e o Costo de Mêli
| ←A Sigaa, o Grillo, e l'Ava | Esopo Zeneize de L'Erboo de Röve, e o Costo de Mêli |
A Pegoa, e o Can→ |
| Zena, Stampaja Pagan, 1822 - Primma ediçion e en stæti reixi con êu e ôu. In notta e diferençe co' l'ediçion do 1846. |
L'Erboo de Röve, e o Costo de Mêli.
Un Röve antigo, ricco de giande,
Con tanti rammi, e così grande
Ch’o l'arrivava co-a testa in Çê,
Tutto superbia, e pin de lê,
Vedendo in terra un custettin
De quelli belli Mëli piccin,
O disse in aja de compassion,
Ma sostegnindo sempre un gran ton:
O figgio cao! cose ti pâi[1]
In paragon di erboi mæ pai!
Così piccin, mi così grande!
Ti pochi mëli, mi tante giande!
Meschin! che stato ti æ disgraziôu!
Quanto mi incangio son fortunôu!
Rispose o Mëlo con umiltæ:
Mi te ringrazio da to bontæ,
Se a mæ miseja te dà fastidio,
A to ricchezza mi non invidio,
Mi son piccin, e ti ti è[2] grande,
Ma vâ ciù un Mëlo, che çento giande,
Che non da-o nûmeo, ma da-o savô
Aquista a frûta meito e valô.
Chi scrive, e parla sempre
Gran lode non otten,
L’è megio scrive poco,
Parlâ poco, ma ben.