Esopo Zeneize 1822/A Sigaa, o Grillo, e l'Ava

by Martin Piaggio

←A Lumassa, e a Formigoa

Esopo Zeneize de Martin Piaggio A Sigaa, o Grillo, e l'Ava

L'Erboo de Röve, e o Costo de Mêli→

Zena, Stampaja Pagan, 1822 - Primma ediçion
${\widehat {eu}}$ e ${\widehat {ou}}$ en stæti reixi con êu e ôu.
In notta e diferençe co' l'ediçion do 1846.

FOA XIV.
A Sigaa, o Grillo, e l'Ava.

Un Grilletto e un-na Sigaa
De Zenâ da-e Ave andon
Affammæ, e morti da-o freido,
Letto, e toa ghe domandon,

Promettendoghe a Sigaa
D’insegnâghe ben cantâ,
E o Grillin ballâ de sbalso
Per distinguise, e figuâ;

A moæ de Ave ghe rispose:
Ve ringrazio, amixi, tanto,
Ma n’importa, che e mæ figgie
Saccian ben o ballo, e o canto,

Mi me premme d’insegnâghe
Quello bello, e bon mestê
D’ese docili, e inzegnose,
Fâ da seja, e de l’amê,

Con quest’arte in tutti i tempi
No ghe pêu mancâ de pan,
Nè a piccâ, come voi atri,
De nisciun ä porta andian.