Esopo Zeneize 1822/Introduzion — A Veitæ, e a Foa

by Martin Piaggio

←Sunetto de Dedica

Esopo Zeneize de Martin Piaggio Introduzion A Veitæ, e a Foa

O Figgiêu, e o Lô→

Zena, Stampaja Pagan, 1822 - Primma ediçion
${\widehat {eu}}$ e ${\widehat {ou}}$ en stæti reixi con êu e ôu.

INTRODUZION.

---

A Veitæ, e a Foa.

Sciortì un giorno a Veitæ
Da un pozzo tutta nûa,
Coscì secca e sparûa,
E i êuggi stralunæ,
Che quelli, che l’ammiavan
Inspaximæ scappavan.

Povea Veitæ a cianzeiva,
Odiâ e schivâ a n’aveiva
Ciù faccia da mostrâ,
Nè lêugo dove andâ;

Se presentò da Lê
A Foa in punta de pê,
Riccamente vestîa,
De modda, e ben guarnîa
Con ciumme, e con diamanti
Fâsi, ma assæ brillanti:
Addio (a disse), Veitæ,
Ti e chì! Cose ti fæ

Sola pe-a stradda, e nûa?...
Çerco (a disse) ventûa,
Son chì che tremmo, e zeo,
Schivâ da tûtti a reo,
Domando inutilmente
Un pö d’allögio ä gente;
Nisciûn manco m’ammîa,
Me paêi ghe metto puîa,
Scappa finna i Figgiêu:
Pazienza! Veddo ben,
Che da un-na vegia anchêu
Ciù ninte no s’otten.

Rispose a Foa: ti æ torto
D’andâ do tutto nûa,
Mi incangio quando sciorto
Son sempre in gran montûa,
M’aggaibbo con manêa,
E tutti me fan cêa;
Ma senti, Sêu bastarda,
Femmo un-na societæ:
Ti sccietta, e mi boxarda,
Cantiemo Foa e Veitæ,
Ti me vegniæ d’accanto
Coverta do mæ manto,
E mi in tò compagnia,
Nisciun me mandiâ via,
I savj me soffrian,
E ti per causa mæ

I matti te sentian
(Meno quelli lighæ),
Dove vorriemo andiemo,
E i gusti contentiemo ,
Ti, grazie ä tò raxon,
Mi, grazie ä mæ finsion,
Sciù dunque prinçipiemmo,
Vegni, te crêuvo, andemmo.