Esopo Zeneize 1822/A Scimia, o Gatto, e o Spegio
| ←O Cavallo Ministro | Esopo Zeneize de A Scimia, o Gatto, e o Spegio |
I Progettisti→ |
| Zena, Stampaja Pagan, 1822 - Primma ediçion e en stæti reixi con êu e ôu. In notta e diferençe co' l'ediçion do 1846. |
A Scimia, o Gatto, e o Spegio.
C’un-na bælla cornixe tutta indoâ,
Pinna d’intaggi fæti zû a feston,
Un-na lûxe de Spegio assæ stimâ,
In t’un salotto a l’ea promê a un barcon,
Dä quæ passando e donne, o belle o brûtte,
Pe' un quarto d’oa se ghe spegiavan tutte;
Passò un giorno d’avanti a questa lûxe
A caxio un Scimiottin, che l’ea de stæ,
E in to vortâse per çercâse e prûxe
O vedde là sto mûro[1] da bughæ,
O resta stuppefæto, e o dixe ohibò!
Ma sciollo, o no s’accorze ch’o l’è o sò;
Nè o se ne poeiva accorze pe-a raxon
Ch’o fû piggiôu in t’un bosco assæ piccin,
Che de Scimie o n’aveiva visto ancon
(Meno qualche Scignoa con l'occialin)[2],
E veddendo sta bestia là promè,
Ghe vegnî coæ d'avvixinase[3] a lè;
Ciancianninetto dunque o s’avvixin-na
D’avanti a-o Spegio, e poi se cianta lì,
Primma o l’amia ben ben, poi co-a sampinna
O se mette a toccâla, e quella ascì,
O s’allarga, o s’accoccia[4], o s’iza[5] in pè,
O vedde, ch’a fà tutto comme lè.
Presto presto o l’amia derrè da-o spegio,
Ma in non vedde nixiun[6], forte ghe sbraggia,
E chi ti è mai, bruttô, mûro de vegio,
Mostro deforme, che ti metti raggia?
Vatt’asconde... « Và ti cö to c....[7] peôu,
(Ghe disse un Gatto bardo lì accocciôu),
« E ti no veddi, nescia, che ti è tì,
« Ti t’è fæta giustizia da to pao,
« Ti è Scimia, ti æ da vive, e môi[8] così[9],
« Conoscite un-na votta, e vanni a-o diao...
« Seguita.... cosa caa, bocchin da baxi....
« Seguita a fà o to elogio... e che! ti taxi?..
O Scimiotto restôu mocco e avvilïo
O se dava in to spegio, e a lè di êuggiæ,
Ma quando o s’accorzè ch’o s’ea tradïo,
E che o Gatto dixeiva un-na veitæ,
O piggiò presto o spegio, e da-o venin
Paffete in terra!... ö fesse in menissin.
Questa foetta do Spegio, che hò contôu
A l’è quella, che o sciollo a fà sciallâ
Perchè o vedde o Ritræto ben copiôu
Do so compagno, ma se poi ghe pâ
De spegiase lè ascì, ch’o manda a-o diao
L'Autô cö libro, Spegio, Scimia e Gnao.