Esopo Zeneize 1822/A Pegoa, e o Spinon

by Martin Piaggio

←O Figgiêu, e a Vespa

Esopo Zeneize de Martin Piaggio A Pegoa, e o Spinon

O Roscignêu, e o Cûcco→

Zena, Stampaja Pagan, 1822 - Primma ediçion
${\widehat {eu}}$ e ${\widehat {ou}}$ en stæti reixi con êu e ôu.
In notta e diferençe co' l'ediçion do 1846.

FOA XXVIII.

A Pegoa, e o Spinon.

Un-na burasca orribile
Con ægua, lampi e troin,
Gragnêua comme i briccocali
Se levò un-na mattin;

Scappava un-na Peguetta
Pe-i boschi criando bæ,
Despersa da-e compagne,
Che ä stalla ëan camminæ;

Ferma, ghe criò un Spinon,
Intra in ta mæ cazetta,
Chi drento no ghe ciêuve,
Vegni, bella Peguetta;

A gh’intra a semplicetta,
Ma appenna intrâ, a se sente
Punze, e streppâ a pelissa
Da quello impertinente,

Che terminâ a burasca,
E voendosene andâ,
A sciortì scciuindo sangue,
E quæxi tutta peâ.

Figgie, ammiæ
Ben dove andæ,
Quanti lêughi co-a magagna!
Chi va a casa no se bagna.