Esopo Zeneize 1822/A Lumassa, e a Formigoa

by Martin Piaggio

←O Lô, e o Bæ

Esopo Zeneize de Martin Piaggio A Lumassa, e a Formigoa

A Sigaa, o Grillo, e l'Ava→

Zena, Stampaja Pagan, 1822 - Primma ediçion
${\widehat {eu}}$ e ${\widehat {ou}}$ en stæti reixi con êu e ôu.
In notta e diferençe co' l'ediçion do 1846.

FOA XIII.
A Lumassa, e a Formigua.

Un giorno un-na Lumassa
Potron-na e mâ inclinâ,
A disse: cose serve
Che stagghe a travaggiâ?

L’è megio no fâ ninte,
Per vive m’inzegniò,
Andiò a röbâ pe-o mondo,
Segûa, che ghe riusciò;

Mi no scigüo, nè canto,
Nisciùn me pêu sentî,
Vaddo adaxin, e legea,^[1]
Nisciùn me pêu scrovî,

Mi veddo, e sento tutto,
Hò quattro corne armæ
De quattro êuggi finissimi,
Che scrêuvan lonxi assæ;

Porriò asconde o bottin
Senza nisciunna pen-na
In ta mæ casa vêua,
Che porto appeisa ä schen-na;

Oh che mestê mai comodo
Scialla! che vaddo a fâ!
Mangiâ, beive, e dormî
Senza avêi da stentâ!

Ma mentre a raxonava
Così forte tra lê,
Ghe disse un-na Formigua:
Vozite un pò in derrê?

Ti no t’accorzi ancon
Con fâ tanto da brava,
Che in te l’andâ, mincion-na,
Ti perdi sempre a bava?

Ti lasci un-na gran striscia,
Chi segna o tò camin;
Cangia mestê, che dunque
Ti fæ cattivo fin.

L’ommo chi tesce inganni,
Do travaggiâ nemigo,
Dove o ghe pensa meno,
O trêuva o sò castigo.

1. ciannin e adaxo inte l'ed. do 1846