Esopo Zeneize 1822/O Lô, e o Bæ

by Martin Piaggio

←A Sigaa, e o Grillo

Esopo Zeneize de Martin Piaggio O Lô, e o Bæ

A Lumassa, e a Formigoa→

Zena, Stampaja Pagan, 1822 - Primma ediçion
${\widehat {eu}}$ e ${\widehat {ou}}$ en stæti reixi con êu e ôu.
In notta e diferençe co' l'ediçion do 1846.

FOA XII.
O Lô, e o Bæ.

Un Agnello paxe paxe
Con un Lô di ciù affammæ
Ean bevendo a-o stesso fiûmme,
Mezi morti dä gran sæ;

L’Agnelletto o l’ea de sotto,
Vêuggio dî contro a corrente,
O Lô in cangio o l’ea de dato,
Che vêu dî verso a sorgente;

Ma sciccomme de mangiâselo
O l'aveiva un-na gran coæ,
O çercò tutti i pretæsti
D’attaccâ bæga cö Bæ:

E per cose, mascarson!
(O ghe prinçipiò a sbraggiâ)
Ti m’inturbidisci l’ægua,
Che a ven tutta impatannâ?

L’è impossibile, o rispose,
Ma tremmando a ciù no dî,
Perchè l’ægua, che mi lecco,^[1]
A no pêu in derré vegnî.

Sbalordîo da sta veitæ,
O ghe disse: Birbo brutto!
Me sovven, che un anno fà
Ti m’è dito un pö de tutto!

E se n’eo manco nasciûo,
Hò sei meixi, disse o Bæ.....
Taxi, pezzo d’arrogante!
M’insultò dunque to poæ.

Così o disse, e in t’un momento
Afferrandolo ö scannò;
Così ö Bæ co-a so' innocenza
I so' giorni o terminò.

Questa Foa a descrive cæo
L’ommo ingiusto, e prepotente,
Che co-e cabale, e i pretesti
Subaccâ o vêu l'innocente.

1. lappo