Due brocche de viovetta/In cantinn-a

Da Wikivivàgna
Sâta a-a navegaçión Sâta a-a çèrchia
Due brocche de viovetta de Carlo Malinverni
In cantinn-a
ed. www.liberliber.it 2010
[p. 85 modifica]
In cantinn-a.


Son torna chì da-o Pippo, perché in te çerti ötoi,
no so comme a se segge, mi me ghe trêuvo ben;
chì mi me scordo i crûzii da vitta, e poi.... e poi....
gh'é ûn insemme de cöse bonn-e, chi me conven.

E metto in primma riga, comme l'é o mæ doveì,
o prinçipâ, degniscima personn-a: o sò bon chêu,
(chêu grande comme o mâ) voî tûtti o conosceì,
e no fa de mestê chì decantâlo anchêu.

Ve-o lì l'amigo Pippo, ch'o no pêu stâ in ta pelle,
che a tûtti o dixe «grazie» e o strenze a tûtti a man,
e destappando o dixe: queste chì, son de quelle
che tegnan l'ommo allegro e che o conservan san.

A lê dintorno comme.... comme ûnn-a gran famiggia,
veddo ûn sciammo d'amixi: ma che amixi! – no son
de quelli che ve capita pe campanâ a bottiggia,
e solo quando o tempo o s'é misso in sciö bon:

tûtti amixi çernûi, tûtti passæ a-o siassetto,
tûtti de vintiquattro caratti, senza tâ....
con tanti amixi intorno, Pippo, ti t'é in to netto,
ti pêu dormî tranquillo, a no te pêu andâ mâ.

Demmo ûnn'êuggiâ chì in gïo: – che vista chi recilla!
che allegria de bottigge!... àmoe.... gotti.... piron....

[p. 86 modifica]

pernixôu, gianco, neigro.... o scciûmma, o mussa, o brilla....
e o scûggia che l'è ûn gûsto zù pe-a göa: – bon!.. bon!..
bon!..

ö sbraggio forte: bon! che tûtto Zena sente,
da-o Mêu scinn-a a Portöja, da-a Chêulloa scinn-a a Prè…
corrî tûtti, Zeneixi, primma che ûn aççidente
o no ve porte via, o ûn fulmine do çê.

Do resto, amigo, o brindixi o dixe: – vento in poppa,
vento in poppa e mâ carmo: fille o tò bregantin
sempre cö stesso carego: – no porriâ dî ûnn-a stoppa
chi diâ: là, se ghe beive ûn bon gotto de vin.

Allegri! evviva! impîme, impîme o gotto e l'àmoa:
tocchemmo, sciù! tocchemmo: ti e mi, cic-ciac, mi e ti....
che bella cösa, amixi, (no se patieìva a càmoa)
poeî vive giorno e nêutte cö gotto in man... coscì!