Due brocche de viovetta/Dui sunetti agredosci
| ←Carabinê Zeneixi | Due brocche de viovetta de Dui sunetti agredosci |
In cantinn-a→ |
| ed. www.liberliber.it 2010 |
Amigo, doppo tanto boggi boggi
ti piggi – a no pä vëa – o Segnô da-e bonn-e,
e vegio peccatô ti t'inzenoggi
pentio, pregando o çê ch'o te perdonn-e:
ti lasci perde i soliti caroggi
pe-a stradda meistra, che e brave personn-e
a porta ä sarvasion, e ti te doggi
comme ûn can ch'o l'ha puïa ch'o se bastonn-e:
ûnn-a botte a doveiva ëse a tò fin,
e no, tremando d'aveì l'ægua ä göa,
o leppego do santo beneitin:
meschin! – lasciando o fâ de me n'impippo,
trammëzo a-e gambe ti t'é misso a cöa
a moen zunte davanti a san Filippo!
Capiscio! gh'é de mëzo o tò figgiêu,
poveo bæ, poveo Tito, povea sciô
finalmente arreixià in te l'ortiggiêu,
speransa ûnica Vostra, ûnico amô:
o so, Françesco, o so: fa cianze o chêu
vedde ûn angieto in letto, sensa cô,
sensa vitta, patïo: l'é vëo; ma anchêu
delûvia.... ebben? – doman, tè! spunta o sô!
spunta o sô, e a tò cianta a se repiggia,
e a ven sciù bella, fresca, regaggïa....
sciollo chi avanti o tempo se beziggia!
dunque, coraggio! – no l'é brûtto o diao
comme se-o finze a nostra fantaxia,
e o doçe o l'é ciù bon doppo l'amäo!