Donaver Antologia 1910/O mainâ de partenza

Da Wikivivàgna
Sata a-a navegassion Sata a-a serchia
O mainâ de partenza de Giambattista Vigo
da l'Antologia do Donaver do 1910
[p. 162 modifica]
O MAINÂ DE PARTENZA


1
Parto, addio mâe ben diletto,
Me ne vaggo a navegâ:
E’n sce l’erboo de trinchetto
Te salûo d’in mezo a- mâ!

2
Veddo i monti da mâe Zena,
Veddo i âegue, veddo o çê,
Che de giorno in bâella scena
Un festin forman de lê.

3
Mentre scrêuvo a mâe casetta
Donde sbattan i lensêu
Penso sempre a-a mâe Ninnetta
E me spaxima o mâe chêu.

4
A Lanterna da-i mâe êuggi
Quande veggo scomparï
Mi me pä tra quelli schêuggi
A mâe Ninna de senti.

[p. 163 modifica]

5
In to mâeximo momento
Forse, forse lê a preghiâ
Che ritorne a sarvamento
Da-i pericoli do mâ.

6
Scomparindo da-a sò vista
Questo legno sospirôu
Comm’a cianze e lê a s’attrista
Che me segge allontanôu!

7
Ciù rischiôzo e pin de stenti
No se dà do mâe mestè,
No sentï sciusciä che venti,
No veddei che âegua e çê.

8
Con o mâ comme e montagne
Gremenïo tûtto d’öchin,
Cö pericolo a-e carcagne
Mi me trêuvo ogni pittin;

9
Ma pensando a-a mâe Ninnetta
Con franchessa sfiddo o mâ
E me pä d’ëse in barchetta
Con lê sola a barchezzâ.

10
In sce l’arba da mattinn-a
Quand’appenn-a spunta o sô,
Cö sò canto a rondaninn-a
A me parla do mâe amô.

11
A me dixe: «Un bell’angiëto
A tò Ninna a t’ha appâegioû,
E a l’alleita cö sò pëto
Che d’avolio o l’è formoû.

[p. 164 modifica]

12
Lê de brûn tûtta vestia,
Con a robba a pittettin
Ciû pietosa a l’ha l’ammïa,
Ciù scîmpatico o faccin.

13
A l’insegna a-o sò tezôu
O tò nomme barbottä
E a ghe dixe: « Mottin d’ôu,
Vegni un giorno bon mainâ».

14
Quande poi ritorno in porto
D’in scia punta là do Mêu
A mâe Ninna con trasporto
A me mostra o sò figgiêu.

15
E sätando zù dabbasso
A lö incontro pe vegnï
Mi me i baxo e me l’abbrasso
Cö scingûlto tûtti dui.