De Franchi Comeddie 1781/Ra locandera de Sampê d'Areña/18
| ←Scena XVII | Ra locandera de Sampê d'Areña de Scena XVIII |
Scena XIX→ |
| a m co-a tirde a l'é stæta reiza co-a doggia m (mm) |
Argentiña, e Detti.
Arg. Sciô Ghigærmo, hò tanto piaxeì de veive de retorno ciù presto che non m’aspetavo. Comme vala? Eì dæto recatto a i vostri interessi?
Ghig. Nò, cara, perchè ho trovaò uña lettera a ra posta dro sciò Giangorgolo, Poære chì dro sciô Tiritoffolo; e son vossuo tornâ presto per reçeivero, e presentaro a Ottavietta.
Arg. (a parte) Non sò comme desbroggiâ questa facenda. (alto) Ah scì scì, ma o sciô Tiritoffolo sarà un poco araggiaò, per uña burla che gh’han fæto çerti zovenotti sprexaddi, che no pensan a atro, che a fâ despêti.
Tirit. (guardando Argentina) E ghe scometto, sciô Ghigærmo, ch’a l'era d’accordio con quelli dezaugiaddi, e a fava lê ascì a sò parte in comedia.
Arg. Non ve piggiæ fastidio de queste bagatelle, sciô Tiritoffolo; che a non sarà a primma, nè l'ultima, da quanto posso capî, de burle che ve faran. Stæ alegramente. Ma chì gh’è Zanettin o Manente, chi porta qualche ambasciâ.