Ciaravalle 1833/O Dottô, e o Carettë

Ciaravalle zeneize pe l'anno 1833 de Martin Piaggio
O Dottô, e o Carettë

O Dottô, e o Carettë.

Un Dottô con duì Procueì,
Se n’andavan tutti treì
In campagna a festezzä
Çerta lite un pò imbroggiá
Che guagnòn; camin facendo,
Mentre stavan rivedendo
A Sentenza co-i pappê,
Incontron un Carettê;
Scicomme ëan de bon umô
O fermon per caregäo;
Ghe domanda o Sciô Dottô
,, E per cose, amigo cäo?,
,, Compatî, semmo ignoranti,
,, O cavallo chi è davanti
,, O l'è moscio, e ben nutrïo
,, E quell'atro chi è inderrê
,, O l’è secco e sperunsïo
,, Che o no pêu manco stâ in pê?..
O vettuin, chi n’ëa mincion
Conoscendoli a l’odô
O rispose; pe a raxon
Che o ciù grasso o l'è o Dottô,
L’atro secco o l’è o so Cliente:
Ghe son servo riverente.