Chittarin zeneize 1881/61

Da Wikivivàgna
Chittarin zeneize de Martin Piaggio
Boñe feste - a-o Michê Tiado
poexia mandâ do 1830 da-o Michelin Piaggio, figgio de l'aotô, a so poin


[p. 61 modifica]

BONN-E FESTE 1



Scià permette, cäo sciô poin,
A-o figgiosso Michelin
Che o ghe posse mandâ anchêu
Ûn strofoggio da pettêu 2
Fæto in sprescia, comme o sa,
D’arescoso do pappà,
Per fâ ûn atto de doveì
E per dâghe con piaxeì
(Ché me piaxe e cose leste)
Finn-a d’aoa e Bonn-e Feste
De Natale antiçipæ,
Pinn-e de prosperitæ
A Voscià e a tûtta l’amabile
Sò famiggia rispettabile;

[p. 62 modifica]

Bonn-a fin de l’anno vegio,
Bon prinçipio e fin ciù mëgio
Do bisestile anno nêuvo
C’ûnn-a lunga rèsta apprêuvo
De tant’ätri, in sanitæ,
Pin de sacchi de dinæ,
Co-i vantaggi temporali
E i aggiûtti spirituali,
Sempre in grazia do Segnô!

Accordæ, Gesù Bambin,
Ve ne prego con ardô,
Tûtte queste grazie a-o poin,
E, versandoghele addosso,
Benedï con Lê o figgiosso!
E Voscià, che scià è ûn santetto,
Scià o preghiä ûn pö o Bambinetto,
Sciô Michê, pe-o Michelin?...

Scì, scià o preghe, cäo sciô poin,
Perché posse, co-o sò aggiûtto,
Diventâ presto ûn ommin
E aggiûttâ o pappà in te tûtto.

[p. 63 modifica]

Ma ne son çerto e segûo
Ché, scibben che son figgiêu,
Zà conoscio per menûo
Dove arriva o sò gran chêu...

No ghe diggo ciù atro, taxo,
E ghe mando anchêu ciù grosso
Ûn sonoro bello baxo;
E me firmo con affetto,
Pin de stimma e con rispetto:

Michelin, o sò figgiosso.


[p. 64 modifica]