Chittarin zeneize 1881/65

by Martin Piaggio

←Boñe feste

Chittarin zeneize de Martin Piaggio Boñe feste - a-o Michê Tiado

Mæximo argomento→

poexia mandâ pe-o Dênâ do 1831 da-o Michelin Piaggio, figgio de l'aotô, a so poin

MÆXIMO ARGOMENTO ¹

Se presenta, sciô Michê,
In t’ûn fêuggio de pappê,
Un pittin mortificôu
E ancon tûtto desgûstôu
Sò figgiosso Michelin,
Per n’aveì manco posciûo
Dâ ciù ûn baxo, né ûn salûo
A l’affettuoso sò poin,
Partïo in sprescia per Milan.

Ma, se scià é andæto lontan
Da-i mæ êuggi, scià no pêu
Lontanâse da-o mæ chêu,
Perche l'ho continuamente,
Giorno e nêutte a mi presente.

Se da Zena scià é partïo,
Se i amixi scià ha lasciôu,
Presto presto, spero in Dio,
Che o veddiö chì ritornôu
In perfetta sanitæ,
Prosperôu d’in ben in mëgio,
Ma per stâghe di anni assæ,
Fin che mi no vegne vëgio,
Onde consolâ i parenti,
I amixi e i conoscenti
Con l'antiga Patria moæ,
Con raxon tûtti dolenti
Che scià i agge abbandonæ.

Mi no posso, cäo sciô poin,
Che pregâ o Gesù Bambin,
Chi n’accorde ûn tanto ben;
E zacché ben presto ven
Quello giorno fortûnôu
De tripûdio ûniversale,
Da-i cristien dexiderôu,

Vêuggio dî o Santo Natale,
Compî vêuggio a-o mæ doveì,
E co-o mascimo piaxeì,
Mi ghe daggo fin d’anchêu
E sò sante Bonn-e Feste,
Augûrandoghee de chêu
Pinn-e d’ogni ben celeste.

Scià gradisce, cäo sciô poin,
Questi voti da lontan
Do figgiosso Michelin,
Che, schissandoghe ûn baxin,
O ghe strenze e baxa a man
E o ghe fa ûn profondo inchin.

---