Chittarin zeneize 1881/53

by Martin Piaggio

←Scherço

Chittarin zeneize de Martin Piaggio Sunetto - A 'n amigo marotto

Sunetto→

SÛNETTO ¹

Ma n’eî manco verghêugna, fæ o piaxei,
A stâ in letto coscì tûtto attillôu,
Con quello berrettin proprio da Beì,
Farçïo de guarnizioin, tûtto accettôu!...

Oh! dæla ben da intende ûn pö a chi voeì
Ch’eì a bubbôa...² ché mi no g’ho allögiôu,³
V’ho visto gianco e rosso comme ûn meì,
Ciù allegro che ûnn-a Pasqua e che ûn sposôu.

A vostra bella faccia regaggïa
A dixe che stæ ben, Bertomelin,
Cangiævea, perché dunque a ve fa a spia.

Mi ve parlo da amigo e da Martin;
Per cöse dunque voeì stâ in letto?... Ho puïa
Che ghe stæ per.... fâ vedde o berrettin.