Chittarin zeneize 1881/315 Cançon

by Martin Piaggio

←Sunetto

Chittarin zeneize de Martin Piaggio Cançon

Ringraçiamento→

i camê Zizzoa e Aostin a-e cazañe da tratoia de Quattro Stagioin.

CANSON ¹

Scignor, questa a l'é a solita
Canson zeneize in bibita
Che debolmente dedican,
Ne-e feste do Bambin,
Con mille complimenti,
I poeti Zizzoa e Aostin ²
A tûtti i ricorrenti
A questo bûtteghin.

L’oggetto o l'é plauxibile,
Per mëgio dî stimabile,
Ansi necessariscimo;

Per dâ a voscignoria
E Bonn-e Feste in mûxica
Strapinn-e d’allegrìa,
De mutte e sanitæ
Da poeìne cacciâ via
E dâne per caitæ.

Bon fin de l'anno vëgio
Che presto o s’inghêuggiä,
Prinçipio e fin ciû mëgio
Do nêuvo chi spuntiä,
Accompagnôu da ûn seguito
De lunghi anni belliscimi
Esenti da-e disgrazie,
Da poeì seja e matin
Vegnî per fâne grazie
Sempre a-e Quattro Stagioin.

Augûrj che ghe femmo
A uffo ciù che poemmo
Per genio e per doveì
E con grande piaxeì;
Pregando a sò bontæ
A voeili ben gradî
E saveì compatî
A gran meschinitæ
De questa cansonetta

Ægua de sûcca sccetta; .
Ché Aostin gran giornalista,
Di fêuggi direttô,
Sciaraddindovinista,³
Zizzoa panbrustolista,
Pittô, ristoratô
E grande macchinista,
Con tûtta a sciurbettesca
Famiggia e cuxinesca
De zelo raddoggiän,
Sempre ciù impegno aviän
De servî con prontessa
E con delicatessa
Per fâ restâ contenti
I bravi intervenienti
A questo bûtteghin,
Ché coscì vêu i padroin.


E chì, finindo in sdruccioli
A dedica co-a predica,
Ghe presentemmo sûbito
A macchinetta elettrica,
Sensa ciù dî ûnn-a scillaba,
Ché o resto o canta l'organo...
Salamelecche!... et cettera.