Chittarin zeneize 1881/105

by Martin Piaggio

←Cançon

Chittarin zeneize de Martin Piaggio Cançon - pi-a morte do papagallo

Sfœugo poetico→

CANSON ¹

Sûnnæ, campann-e,
Non d’allegria,
Ma da ciù tetra
Malinconia;

Ciù no se parle
De vegge e scialli,
Ciù no se vadde
A canti e a balli,

Perché l'é morto,
Oh gran rovinn-a!
O pappagallo
Da sciâ Rosinn-a.

Morte senscibile
E ciù afflizzente,
Non de maottïa,
Ma d’aççidente!...

Ûn coccoretto
Che zà o parlava,
Toccava a patta,²
Rieiva e baxava,

E o prometteiva
De voeì vegnì
Ûn vëo Demostene
In discorrî.

Destin crudele!...
Ma l'ëa deciso
Che andâ o dovesse
Presto in Eliso.

No stæ ciù a cianze,
Bella Rosinn-a,
Pe ûnn-a bestiûssa
Pappagalinn-a;

Perchè gh'é a-o mondo
Tanti ätri öxelli,
Lûgain, canäi,
Merli e frenguelli,

Che, se no parlan,
San ben cantâ,
E in manezzäli
No pêuan beccâ.
 
Sciûghæve e lägrime,
Ché ve prometto
Vegniä ben presto
O sciô Enrichetto,
   
Chi ve portiä
Ûn ätro öxello
Do pappagallo
Ancon ciù bello,

Da poeìlo sûbito
Domestegâ,
E in gaggia e fêua
Ben appittoâ.

Sciallæve dunque,
Fæve coraggio
E consolæve
Ch’o l'é per viaggio.

Me pä de veddilo
Intrâ ne-o porto,
Sbucâ impaziente
Da-o boccaporto,

Sbarcâ in t’ûn gosso
Da-o Ponte Reâ
E a sò Fenice
Vegnî a abbrassâ.

Ché se in America
O prolungasse
O sò soggiorno
E o ritardasse,

No dûbitæ,
No pêu mancâve
Parenti e amixi
Per consolâve.

E mi pe-o primmo,
Vostro cuxin,
M’avieì pe-a casa
Seja e mattin.