Cava in to remoin 1930/PENNELLAE A SGUASSO (TRITTICO)

by Gioxeppe Cava

←Coscì dixeiva ûn merlo

In to remoin de Gioxeppe Cava Pennellae a sguasso (Trittico)

O mae giardin→

PENNELLAE                      A                      SGUASSO
      (Trittico)

I

PAISAGGIO DE PRIMAVEIA

(Mattin)

A-a drita e rovinn-e
d'ûn vëgio castello,
in fondo ûn rastello
che o saera ûn giardin.

Da l'atra ûnn-a casa
gianetta, grazïosa,
êuggezza coïsa
fra e ramme di pin.

Fra i prae tûtti verdi,
macciae de scioettinn-e,
de gianche pegoinn-e
intorno a ûn barchî.^[1]

E ûn çê lûminoso
coscì trasparente
che ammiandou se sente
l'incanto d'Arvì.

II

VALLADDA D'ESTAE

(Mezogiorno)

Ûn sô che e çervelle
o chêuxe e imbarlûga
e indora a bell'ûga
inçimma a-i maxê.

Fra e erbe ûn rianetto
incroxa a sò ciaea
canson co-a sigaea –
'na biscia de çê.

Lazzù in sce l'atûa,
redosso a-a collinn-a
'na bella cascinn-a
co-e case vixin.

E dovve a valladda
a s'arve maestosa
a vista grandiosa
dö mâ celestin.

III
MARINN-A
(In sce ö tramonto)

De nûvie che coran
aççeize pe l'aïa,
fra i schêuggi ûnn-a baia
tranquilla e ombrezzâ.

Tre o quattro casette
co-i veddri che lûxan,
de donne che cûxan
e rae da pescâ.

Vixin a-o sbattizzo,
dùi gössi co-a veia,
aspetan a seïa
pe-o largo sarpâ.

Poi là comme ûn fûmme
i monti de Zena,
a bella sirena
che a domina ö mâ.

1. Fontana rustica.