Cava in to remoin 1930/A FORTESSA DE PRIAMÂ
| ←Ricordanse | In to remoin de A fortessa de Priamâ |
A Cristoforo Colombo→ |
A FORTESSA DE PRIAMÂ
O furtûnôu d'Onegia,
Duxe zeneize, o Doia,
de guaere fratricide
questa l'é a têu memoia;
questa Fortessa grixa,
massiscia e impönente,
sciortia da-o têu çervello
ardìo e prepötente,
che i 'na çittae soggetta
cö faero e con l'inganno
döveiva sempre s-ciava
tegnî do sêu tiranno.
Doia, i têu êuggi d'aquila
l'han contemplà orgogliosi
e l'han trovâ ben degna
di sêunni têu ambiziosi;
pûre 'ste spesse mûagie[1]
no han dito a-o têu pensiero
quanto mai fosse fragile
da forza ö sölo impero.
Ammia! son quaexi intatte,
i secoli han sfiddôu,
ma ö tempo de discordie
pe sempre o l'é passôu.
Doia, di âtri prinçipi
han calcolôu l'orröre
de questa têu Fortessa
pe ammortâ in chêu l'ardore
d'ûn zôveno zeneize[2]
che, a-o föndo d'ûnn-a cèlla,
a l'ûnitae pensava
da nostra Italia bella;
ma invece in ta segreta
de faccia a-o nostro mâ,
quell'anima gaggiarda
a-a lotta a se tempià.
Doia, son staeti inûtili
questi bastioin potenti
a imprexônâ ö pensiero,
a ostacölâ i eventi;
l'intrega Taera Ligûre
a forma ûnn-a regiön
industriösa e forte
da libera Nazion!