Cava in to remoin 1930/A CRISTOFORO COLOMBO
| ←A fortessa de Priamâ | In to remoin de A Cristoforo Colombo |
Semplicitae cicciollaea→ |
A CRISTOFORO COLOMBO
Colombo, a l'é ridicola
di grandi ommi a sorte,
de no possede a paxe
manco a-o delà da morte;
specie se a votte càpita,
e a Tî proprio succede,
de no possede in regola
de nascita ûnn-a fede.
Cörpa di tempi barbari
ne-i quae Tî t'ë vissûo,
se ö scito da têu nascita
o no l'é ben segûo;
ma a cörpa vera e mascima
l'é a teû celebritae
se te vêuan dâ i natali
çento localitae.
Grossa fatiga! Inûtile
tormento a vëgie carte,
forzae pe fane appoggio
a l'ambizion de parte;
oppûre de man abili
apocrife scrittûe
pe dâ da lûxe a ûn zêugo
zûgou a carte scûe,
che han solo da càmoa
l'autentico rezûggio
e o tanfo pûre autentico
de vëgie carte a mûggio.
* *
Nato da-a razza ligûre,
semenza de mainae,
che l'ardimento a rêdita
da-e ciû lontann-e etae,
pe Tî no gh'ëa de ostacoli
e a forza de costansa
t'ae vinto ö ciû terribile
quello dell'ignöransa.
là in mezo a-o grande Oceano,
con l'eûggio a tramontann-a,
o t'é comparso a-a mente
ö petenôu de lann-a,
a bûtteghetta ûmida
in fondo a San Giûlian[1]
döve t'ae presto impreizo
a guadagnate ö pan.
T'ae rigordôu e libere
scappadde a Prïamâ,
ciamôu da-a grande vöxe
do nostro bello mâ,
che co-e maestose fûrie
e con i carmi incauti,
o te förgiava l'anima
d'âsä che a-i naviganti
doveiva ö çercio magico
rompî cö Grande Evento
e consegnâ i mâ liberi
a-o libero ardimento.
E e taere che emergeïvan
davanti a-a prôa obbediente
a-a forza do têu genïo,
ti segnalavi a-a gente
co-i nömmi a Tî caiscimi
dö pôae, dö Sarvatô,
che insemme a sta Saona,
ti amavi in chêu d'amô;
comme a ciamâ partecipi
da teu immensa gloria,
che a-o mondo intrego arviva
Nêuva e Civile Storia.
Colombo, a neigra invidïa
beive l'arfê t'ha faeto;[2]
chi te doveiva ûn möndo
ûnn-a prexön t'ha daeto.
E tûtto a têu grand'anima
l'ha söpportôu segûa
ûmile in mezzo a-a gloria,
sdegnosa in ta sventûa;
ma a no restiae insenscibile
a-i storici tormenti
che te vêuan dâ di estranî
pe proscimi parenti.
Ah, no! Ombra grandiscima
no ingigantisce i nani,
e queste «dotte diatribe»
no son che sêunni vani
de mente che farnetican
da-i raggi da têu gloria,
avèi l'orgoglio e a luxe
che a no g'ha daeto a Storia.
* *
Dorme, Colombo, e lascïeli
sciûgâ d'inciostro ùn pösso;
no pêuan negâ che i avi
no t'han concesso ûn gösso[3].
Questo l'é ben çertissimo,
e senza de Isabella
n'avien i «dotti storici»
aççeiza sta ratella:
pe voeïne tiâ dö merito
manchieva ogni raxon
perché ti siesci morto
perdonna! da strasson.