Bolle de savon/Sûnetto per nosse
| ←Pe-o X Marso, tûtti da Mazzin!... | Bolle de savon de Sûnetto per nosse |
Baciccia→ |
(a-o sposôu)
Ti te-a sciorbi co-i êuggi, e t'hae raxon;
no s'é mai visto ûnn-a ciù bella figgia:
a l'é ûn gotto de laete, ûn bon boccon,
(collo a saliva) e fortûnôu chi a piggia.
Lê «a pâ ûn sô dro levante a ro barcon»,
ti quello che s'ascada e che s'assoiggia:
va là! che t'ë nasciûo cö tempo bon,
e ti no t'ë bûttôu zù da ûnn-a liggia.
Za che a l'é a tò - sto bello pestûmmin
che do Cavalli a se meitiae ûn sûnetto,
degna d'ëse adorâ seja e mattin,
mettila in ta custodia, in te ûn scrignetto,
comme ûnn-a cösa caa, comme ûn rûbin,
dagghe di baxi e... portitela in letto.