Bolle de savon/Baciccia
| ←Sûnetto per nosse | Bolle de savon de Baciccia |
Cocchetto e çigaa→ |
Quante son i Baciccia?... Poeì contâ...
ghe n'é d'ogni fasson, d'ogni mestê:
quant'en e gosse d'aegua che l'é in mâ?...
o i granin d'aenn-a?... o e stelle che l'é in çê?...
Ogni famiggia, se pêu dî, zeneize
a-o sò Baciccia a l'ha e candeje aççeize.
Sto nomme a Zena o l'é ûn istituzion:
e chi dixe Baciccia dixe Zena:
comme torta, Lanterna, menestron,
comme Togno, Cattaen, Steva, Manena:
e in mëzo a-i boschi e in mëzo a-i xilidöi
scinn-a o merlo o scigöa: Ciccia di cöi!...
Pe questo, a-i belli tempi da bonassa,
aveiva i sò lûmmetti ogni barcon,
aveiva a sò bandëa ogni terrassa,
se trincava con l'àmoa e cö piron;
furgai, spari, tric-trac, sciati, allegrie,
disnae, çenn-e, sciampradde e ätre lûçie.
Ninte per anchêu de tûtto questo: - semmo
chì cö chêu streito e cö respïo piccin;
e i Baciccia o scignor comme o malemmo,
o ponçeviasco comme o çittadin,
o farchetto do monte e o zin do schêuggio
son tûtti là in trincëa cö scciêuppo all'êuggio.
Son tûtti là in trincëa cö scciêuppo all'êuggio;
e aspëtan che o tedesco o vegne a tïo
co-i nervi teizi, fermi comme ûn schêuggio,
pronti a-o comando a satâ sciù d'asbrïo;
se o diao sta votta o no ghe mette a cöa,
porchi tedeschi, a ve restiâ in ta göa.
A ve restiâ in te göa: - non l'é pe voî
che in ti campi matûra o nostro gran,
che in ti nostri giardin gh'é tante scioî,
che e collinn-e e a cianûa tant'ûga fan:
e nostre donne, belle comme o sô,
no l'é con voî che devan fâ l'amô.
Basta! se sente zà ûnn-a scinfonia
chi fà sperâ che sciûscie o vento in poppa:
sotta!... ûn côrpo de man... spassaeli via...
sciù! coraggio, Baciccia…. Aggoanta.... accoppa…
e pe dâve do chêu tegnî a memoia
o sascio do Balilla de Portoja.
E poi tornieì... Ve veddo zà a-o ritorno
piggiâ o baxo da tûtte e belle figge:
che mûxiche, che canti quello giorno!
Spari, furgai, lûmmetti, àmoe, bottigge,
brindixi, abbrassi, canti... Fêugo ä miccia:
Viva l'Italia e Zena e i sò Baciccia!
1917