Bolle de savon/Pe-o X Marso, tûtti da Mazzin!...

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
Pe-o X Marso, tûtti da Mazzin!...
[p. 166 modifica]
Pe-o X Marso, tûtti da Mazzin!...

a Francesco Ottone.


Che mette ogni terrassa a sò bandëa,
che in porto scinn-a o gosso agge o paveize;
a-i barcoîn di palassi ûnn-a portëa,
cö sò domenegâ chi é vëo zeneize;
e nisciûn manche a sta dimostrazion...
Sciù! tûtti in riga, tûtti in procescion.

Papè, portaeghe ascì i figgiêu pe man,
e i ciù piccin, mamè, portaeli in brasso,
e dîghe e faeghe intende, se nö san,
cösè l'é anchêu tûtto sto gran fracasso,
e insegnae a tûtti quelli cäi bocchin
che ödöan de laete, o nomme de Mazzin.

Dîghe chi o l'ëa; - c'o l'ha visciûo d'amô,
e fando o ben; - che a solita genïa
a criâva: - daeghe tûtti c'o l'é, o lô! -
comme, pe tempi, a criâva pe-o Mescïa,
perchè a l'aeiva o spaghetto da sò voxe,
e comme l'ätro, a l'aviae misso in croxe;

[p. 167 modifica]

e c'o l'aveiva ûna mamà Mazzin,
ûnn-a mamà c'a l'ëa ûnn-a santa donna:
che se lë da figgiêu o paeiva ûn bambin
do presepio, lê a paeiva ûnn-a madonna,
e do figgio ne-a vitta abburascâ
sempre a l'é staeta a vëa stella do mâ.

Dîghe: - a parolla de Mazzini, viva
comme ûnn-a sciamma, a l'ascädava a gente,
e quello che o-a lezeiva o c'o-a sentiva
o-a fäva sò, o se-a tegniva a mente;
e a l'ëa comme a semensa do villan
che ûn giorno a diventiâ spiga de gran....

Spiga de gran! in mëzo a-i campi anchêu
te veddemmo matûra e cö dell'öu:
ti piaxi a tûtti, scinn-a a sti figgiêu,
ti ë a speransa di popoli e o resciöu,...
Ma chi con stento ha preparôu o terren
o no te vedde; - o l'é lazzù a Staggen.

Pe-o dexe marso, tûtti da Mazzin!
Segge Staggen artâ, gexa, santuajo;
e vadde là, sensa segondi fin,
o nobile, o borgheize, o proletajo,
ma cö zûamento de vegnî inderrê
comme da ûnn-a bûgâ: - degni de Lê.

1919