Bolle de savon/Pe-o "Cavagnetto" a-i sordatti zeneixi
| ←Sûnetto elettorale | Bolle de savon de Pe-o "Cavagnetto" a-i sordatti zeneixi |
Pe-o X Marso, tûtti da Mazzin!...→ |
Chi me dà pe ûn momento, pe ûnn'öa,
quella rimma che tocca e và a-o chêu?
chi m'insegna e me mette in ta göa
a tò bella canson, roscignêu?
A sti versci cacciae zù de sprescia
chi dajâ grazia e mûxica e o cô?...
A mae Mûza a va in gïo comme nescia
pe sciortîne, s'a pêu, con onô.
Sci! le a çerne e parolle ciù cäe,
c'han o lecco, ch'en pinn-e d'amê....
Ah! e çigae sajän sempre çigae,
e ciaebelle n'en stelle do çê.
Ma voî tûtti, scignori e scignöe,
o sò fâ coscì ä bonn-a capî:
dixe dunque che a cösa a l'é in döe:
o dâ l'obolo, o fäse scoxî.
Che scoxî!... mai ciù segge! - Scometto,
cäi scignori e scignöe, che ne dae
(perchè seì che se fà o «Cavagnetto»
pe-i sordatti) lïe... södi... dinae.
Ûn odô sta fucciàra a ghe porte
de famiggia, de Zena, de mâ,
a sti eroi che difendan e porte
da sò casa con brasse d'äsâ....
Strofe scritte a richiesta del Comitato Borgo Pila-Foce.
1918.