Bolle de savon/Mascherinn-a, te conoscio!
| ←Pasqua | Bolle de savon de Mascherinn-a, te conoscio! |
Da-o monumento de Mazzin→ |
A no pä manco da credde
comme, quande o sangue o bogge,
paan e cöse che se vedde,
dogge e sence, sence e dogge:
gh'é in sce tûtto comme ûn vello
cô de reuza o celestin...
e alloa a testa a fà o moinello,
balla o chêu o peligordin.
Aoa veddo e scanso o lammo
fasso o sordo a ogni reciammo:
chì m'annojo, là m'angoscio....
mascherinn-a, te conoscio!
I ommi e e donne i veddo comme
son de drento e son de fêua;
ciammo e cöse cö sò nomme,
e co-i anni ho faeto schêua:
n'é tûtto öu quello chi lûxe,
che se vedde dä lontan,
e chi briga p'ëse dûxe
o n'é poi che ûn ciarlattan:
dove vaddo, dappertûtto,
gh'é do fäso, gh'é do brûtto:
là m'imboso, chì me fruscio....
mascherinn-a, te conoscio!
Gh'é chi parla dä tribûnn-a?
vaddo, sento, e... me ne rïo:
ahimemi! a sti ciaei de lûnn-a
gh'é da aveighe poco fïo:
dä carassa lê o s'appaegia
co-e sò ciarle o careghin,
e mi sö coscì bonnaegia
de tiâ sciû sto burattin?
Monta chì e ti veddi Zena!
canta, cäo, canta, sirena:
piggio o liscio, fasso o moscio....
mascherinn-a, te conoscio! -